قازاقستاندا ەپيدەميولوگيالىق جاعداي جىل سايىن كۇز-قىس ايلارىندا ۋشىعاتىنى بەلگىلى. بيىل دا جرۆي مەن تۇماۋ بويىنشا ءوسىم بايقالىپ وتىر. بۇل تۋرالى دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ پىكىر ءبىلدىردى، دەپ حابارلايدى «ادىرنا» ءتىلشىسى.
ونىڭ ايتۋىنشا، بيىل اۋا رايىنىڭ جىلى بولۋىنا بايلانىستى جرۆي ماۋسىمى بىرنەشە اپتاعا ەرتەرەك باستالعان.
«وسى جىلى اۋا رايى جىلى بولىپ تۇر. سول سەبەپتى جرۆي ماۋسىمى بيىل بىرنەشە اپتاعا ەرتەرەك باستالدى. الايدا وتكەن جىلمەن سالىستىرعاندا جالپى اۋرۋشاڭدىق تومەن. وتكەن جىلى 1 400 000 جاعداي تىركەلگەن بولسا، بيىل بۇل كورسەتكىش 20 پايىزعا ازايىپ وتىر. دەنساۋلىق ساقتاۋ مينيسترلىگى ءوز تاراپىنان قاجەتتى شارالاردى قابىلداپ، جاعدايدى تولىق باقىلاۋدا ۇستاپ وتىر»،- دەدى ول.
ۆيتسە-ءمينيستردىڭ مالىمەتىنشە، بيىل 2 100 000 ادام تۇماۋعا قارسى ۆاكتسينا العان. ۆاكتسينا ەڭ الدىمەن بالالارعا، جۇكتى ايەلدەرگە، سوزىلمالى اۋرۋلارى بار ناۋقاستارعا جانە مەديتسينا قىزمەتكەرلەرىنە سالىنعان.
سونداي-اق مەديتسينالىق ۇيىمداردا قوسىمشا فيلترلىك كابينەتتەر اشىلعان.
«قازىر رەسپۋبليكا بويىنشا ەمحانالار مەن اۋرۋحانالاردا 1 800-گە جۋىق فيلتر كابينەتى جۇمىس ىستەپ تۇر»،- دەدى ۆەدومستۆو وكىلى.
تيمۋر سۇلتانعازيەۆ ەلدە گونكونگ تۇماۋىنىڭ دا انىقتالىپ جاتقانىن ايتتى.
«گونكونگ تۇماۋى — كادىمگى ماۋسىمدىق تۇماۋ. 1968 جىلدان بەرى بەلگىلى. قازىرگى ۋاقىتتا شامامەن 590 جاعداي پتر ارقىلى انىقتالدى. بۇل — H3N2 تيپىندەگى ا تۇماۋى، بۇرىننان اينالىمدا جۇرگەن ۆيرۋس»،-دەدى ول.
سوڭعى كۇندەرى كەيبىر دارىلەردىڭ كومەكتەسپەي جاتقانى جانە تاپشىلىعى تۋرالى شاعىمدارعا دا توقتالدى.
ء«دارى-دارمەكپەن قامتاماسىز ەتۋ بويىنشا ءبىز ءىرى فارماتسەۆتيكالىق كومپانيالارمەن جانە ديستريبيۋتورلارمەن كۇن سايىن جۇمىس جۇرگىزىپ جاتىرمىز. كەشە عانا ولارمەن كەڭەس ءوتتى. ولاردىڭ ايتۋىنشا، قويمالاردا ۆيرۋسقا قارسى پرەپاراتتار، ستەرويدتى ەمەس قابىنۋعا قارسى دارىلەر، پاراتسەتامول، يبۋپروفەن جانە باسقا دا قاجەتتى پرەپاراتتار تولىق كولەمدە بار. ءبىز كەلىسىم بويىنشا ءدارىحانالاردى قاجەتتى مولشەردە دارىلەرمەن قامتاماسىز ەتۋ مىندەتىن الدىق»،-دەدى سۇلتانعازيەۆ.
