كوروناۆيرۋس ىندەتى كوپ نارسەنىڭ بەتىن اشتى. بىزگە جاڭاشىلدىق كەرەك. بيلىككە باسقاشا جۇمىس ىستەۋ قاجەت. ۇكىمەتتىڭ كەڭەيتىلگەن ماجىلىسىندە پرەزيدەنت توقاەۆ «حالىق جەرگىلىكتى جانە ورتالىق بيلىككە دە سەنبەيدى. يدەولوگيالىق اپپاراتقا ءبىلىم، تاجىريبە، وي ۇشقىرلىعى، باتىلدىق جەتىسپەيدى. مەملەكەتتىك باسقارۋدى قايتا قۇرۋ قاجەت» دەپ اتاپ كورسەتتى.
شىندىعىندا دا سولاي. ءبىزدىڭ مەملەكەتتىك بيلىككە جاڭاشىل، پاتريوتتىعى مول ازاماتتار قاجەت. مۇلدە جاڭا بۋىن كەرەك. ولاي بولماسا، تسيفرلى كورسەتكىشتەردى جەلەۋ ەتىپ، سوعان ماقتانىپ، جالاۋلاتىپ جۇرە بەرەمىز. وتىز جىل سولاي بولىپ كەلدى، ەگەر جۇيەنى تولىق وزگەرتپەسەك، وسىلاي جالعاسىپ كەتە بەرەدى. ويتكەنى بيلىكتە وتىز جىلدان بەرى كەلە جاتقاندار باياعى سول شەنەۋنىكتەر. مينيستىرلىكتەن مينيسترلىككە، باعىنا قاراي تاعى اۋىسىپ جۇرە بەرەتىندەر. ۇكىمەتتىڭ بايىرعى جانە قازىرگى مۇشەلەرى دە سولار. مينيستىرلىكتەن كەتسە، ايماققا باسشى بولىپ بارادى.
اقش-تىڭ پرەزيدەنتى بولعان رونالد رەيگاننىڭ كەيىنگىگە قاناتتى بولىپ قالعان ءبىر ءسوزى بار: «ۇكىمەت ەشقاشان پروبلەمانى شەشپەيدى، ويتكەنى ۇكىمەتتىڭ ءوزى – پروبلەما».
ايتىڭىزشى، 30 جىلدا ءبىزدىڭ ۇكىمەت نە ءبىتىردى؟!
-
اتى دارداي «تسيفرلىق قازاقستان» باعدارلاماسىنىڭ جايى توتەنشە جاعداي كەزىندە تۇككە العىسىز بولىپ قالدى. وسى كۇنگە دەيىن قازاقستاننىڭ 250 ەلدىمەكەنى ءجونى دۇرىس ساپالى ينتەرنەتپەن قامتاماسىز ەتىلمەگەن.
-
مۇعالىمدەردىڭ 20 پايىزدان استامىندا تولىققاندى ينتەرنەت پەن كومپيۋتەر جوق.
-
رەسپۋبليكا مەكتەپتەرىنىڭ بالانسىنداعى 400 مىڭنان استام كومپيۋتەردىڭ تەك 40 پايىزى عانا ىسكە جارامدى.
-
وتاندىق ءدارى-دارمەكتىڭ ۇلەسى بار-جوعى 15 پايىز شاماسىندا عانا. دەنساۋلىق ساقتاۋ مينيسترلىگى ىندەت كەزىندە ءوزىنىڭ مۇلدەم دارمەنسىزدىگىن كورسەتتى.
-
وسىدان 2 جىلداي بۇرىن قابىلدانعان حالىقتىڭ كۇندەلىكتى تۇتىنۋىنا ارنالعان مەملەكەتتىك «قاراپايىم زاتتار ەكونوميكاسى» باعدارلاماسى بار. وعان 1 تريلليون تەڭگە بولىنگەن. بۇل باعدارلاما بويىنشا حالىققا قاجەتتى 365 تۇتىنۋ بۇيىمدارى مەن ماتەريالدارى ءوندىرىلۋى كەرەك. ونىڭ ءبىرىن دە قازىر ەل كورىپ وتىرعان جوق.
-
سوڭعى ءبىر جارىم جىل ىشىندە يمپورتتى الماستىرۋ جانە جۇمىسپەن قامتۋ باعدارلاماسىنىڭ شارتتارى 6 رەت قايتا قارالعان. ال بولىنگەن 200 ميلليارد تەڭگەنىڭ تەك بەستەن ءبىرى عانا يگەرىلگەن.
-
جەڭىل ونەركىسىپتى دامىتۋعا ۇكىمەت قۇلىقتى ەمەس. توقىلعان جەمپىرلەر مەن كەۋدەشەلەردىڭ 98,9 پايىزى سىرتتان اكەلىنەدى. بار بولعانى 1,1 پايىزى عانا – وتاندىق ءونىم.
-
ال سىرتقى كيىمدەردىڭ 97,9 پايىزى شەتەلدەن كەلەدى، 2,1 پايىزى عانا –قازاقستاندىق ءونىم.
-
سپورتتىق كيىمدەردىڭ 83,1 پايىزى يمپورتتىق تاۋارلار بولسا، 16,9 پايىزى عانا وتاندىق ءوندىرىستىڭ ۇلەسىنە تيەدى.
-
شۇلىق، توقىما ونىمدەرىنىڭ 80,7 پايىزى شەتەلدەن تاسىمالدانسا، 19,3 پايىزى عانا – وتاندىق ونىمدەر.
-
قازاقستانعا قۇرعاق ءسۇتتىڭ 83 پايىزى، سارى مايدىڭ 31 پايىزى، ىرىمشىكتىڭ 61 پايىزى شەتەلدەن كەلەدى.
-
ىندەت پرەزيدەنت ايتقانداي، مەملەكەتتىك ءتيىمدى باسقارۋدىڭ جوقتىعىن، الەۋمەتتىك-ەكونوميكالىق جاعدايدىڭ وتە تومەن كەتكەنىن، حالىق پەن بيلىكتىڭ اراسى الشاقتاپ كەتكەنىن انىق كورسەتىپ بەردى.
-
وتىز جىلدا مەملەكەتتىك ءتىلدىڭ مارتەبەسىن ارتتىرا الماعان، ءوز تىلىندە سويلەمەگەن، سويلەگىسى دە كەلمەگەن ءبىزدىڭ مينيسترلەردىڭ ساناسى ۇلتتىق رۋحاني تۇرعىدان جاڭعىرا العان جوق.
... كۇنى بۇگىنگە دەيىن حالىقتىڭ تابىسىن ارتتىرا الماعان، وليگارحتار مەن بايشىكەشتەردەن جاساقتالىپ كەلگەن مۇنداي ۇكىمەت مۇشەلەرى كىمگە كەرەك؟ دەمەك، پرەزيدەنت توقاەۆ ايتقانداي، ەندى بىزگە «مەملەكەتتىك باسقارۋدى قايتا قۇرۋ قاجەت». بۇل ۇكىمەتتى بيلىكتە قالدىرۋعا بولمايدى!
ەركىن قالدان،
«ادىرنا» ۇلتتىق پورتالى
