اقش باسشىسى دونالد ترامپپەن بۋداپەشتتە وتەتىن كەزدەسۋدە رەسەي پرەزيدەنتى ۆلاديمير ءپۋتيننىڭ قاماۋعا الىنبايتىنى بەلگىلى بولدى، دەپ حابارلايدى "ادىرنا" ۇلتتىق پورتالى.
ۆەنگريانىڭ سىرتقى ىستەر ءمينيسترى پەتەر سييارتونىڭ ايتۋىنشا، ۆەنگريا رەسەي پرەزيدەنتىن قۇرمەتپەن قارسى الىپ، ونىڭ ەلگە كەلۋىن، كەلىسسوزدەردىڭ ءساتتى ءوتۋىن جانە وتانىنا امان-ەسەن ورالۋىن قامتاماسىز ەتەدى.
ء«بىز پرەزيدەنت ۆلاديمير ءپۋتيندى قۇرمەتپەن قارسى الامىز جانە ونىڭ ۆەنگرياعا كەلۋىنە بارلىق جاعداي جاسايمىز. بۇل ءۇشىن ەشكىممەن كەلىسۋدىڭ قاجەتى جوق»، – دەدى سييارتو.
ۆەنگريا ۇكىمەتى بۇل شەشىمدى ەلدىڭ ەگەمەندىگىمەن ءتۇسىندىرىپ وتىر. سونداي-اق، مينيستر پۋتين مەن ترامپتىڭ كەزدەسۋى وتەتىن ورىن مەن ناقتى كۇن ءالى بەكىتىلمەگەنىن، تەحنيكالىق دايىندىقتار ءجۇرىپ جاتقانىن ايتتى. ال شارا «بۋداپەشت ءسامميتى» دەپ اتالادى.
بۇعان دەيىن ۆەنگريا پرەمەر-ءمينيسترى ۆيكتور وربان الەۋمەتتىك جەلىدە ەلدىڭ بەيبىتشىلىك سامميتىنە دايىندالىپ جاتقانىن جازىپ، «ۆەنگريا – بەيبىتشىلىك ارالى» دەپ مالىمدەگەن ەدى.
ايتا كەتەيىك، ۆەنگريا حالىقارالىق قىلمىستىق سوتتىڭ (حقس) مۇشەسى رەتىندە پۋتينگە 2023 جىلى شىعارىلعان تۇتقىنداۋ وردەرىن ورىنداۋعا مىندەتتى. الايدا بۋداپەشت بۇل تالاپتى ورىنداۋدان باس تارتتى.
بۇعان ۇقساس جاعداي 2025 جىلى يزرايل پرەمەر-ءمينيسترى بينيامين نەتانياحۋ ەلگە كەلگەندە دە قايتالانعان. سول كەزدە دە ۆەنگريا حقس وردەرىن ورىنداعان جوق.
كەيىن ۆەنگر پارلامەنتى ەلدى حالىقارالىق قىلمىستىق سوت يۋريسديكتسياسىنان شىعارۋ تۋرالى شەشىم قابىلداعان، بىراق بۇل پروتسەسس ءالى تولىق اياقتالعان جوق.
ەسكە سالا كەتەيىك، ءپۋتيننىڭ دۋشانبەدە وتكەن “ورتالىق ازيا – رەسەي” سامميتىنە جانە تمد مەملەكەت باسشىلارىنىڭ كەڭەسىنە قاتىسقان ساپارى كەزىندە تاجىكستان بيلىگى دە حالىقارالىق قىلمىستىق سوتتىڭ وردەرى تالابىن ورىنداعان جوق. وسىعان بايلانىستى ەۋروپالىق وداق تاجىكستاندى حالىقارالىق قۇقىق نورمالارىن بۇزدى دەپ ايىپتاعان بولاتىن.
