قازاقستان ۇكىمەتى التى اي مەرزىمگە كارتوپ ەكسپورتىنا تىيىم سالۋ تۋرالى شەشىم قابىلدادى، دەپ حابارلايدى "ادىرنا" ۇلتتىق پورتالى پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
تىيىم تەك ەۋرازيالىق ەكونوميكالىق وداق ەلدەرىنە جاسالادى. بۇعان كارتوپقا سۇرانىستىڭ كۇرت ءوسۋى سەبەپ بولعان.
«كورشىلەس ەلدەردەن، اسىرەسە وزبەكستاننان سۇرانىستىڭ ارتۋىنا جانە بيىلعى جىلى ەكسپورتتىق باعالاردىڭ جوعارى بولۋىنا بايلانىستى كارتوپ ەكسپورتى 411 مىڭ توننادان 605 مىڭ تونناعا دەيىن ارتتى. بۇل سۇرانىس ىشكى نارىققا اسەر ەتتى. سوڭعى اپتادا ەكسپورتقا باعىتتالعان وندىرۋشىلەردىڭ باعاسى 170 تەڭگەدەن 270 تەڭگەگە دەيىن كۇرت ءوستى»، – دەلىنگەن حابارلامادا.
ۇكىمەتتىڭ مالىمەتىنشە، 16 قاڭتاردان باستاپ ەكسپورتقا فيتوسانيتارلىق سەرتيفيكاتتار بەرۋ تولىقتاي توقتاتىلدى.
«قابىلدانعان شارالار كارتوپ باعاسىنىڭ تۇراقتىلىعىن قامتاماسىز ەتۋگە، باعانىڭ نەگىزسىز وسۋىنە جول بەرمەۋگە جانە الىپساتارلىق ارەكەتتەرىن بولدىرماۋعا باعىتتالعان»، – دەپ اتاپ ءوتتى ۇكىمەت.
ۇكىمەتتىڭ مالىمەتىنشە، قازىرگى ۋاقىتتا قولدا بار كارتوپ قورى 2025 جىلدىڭ ەرتە جينالاتىن ونىمىنە دەيىن ىشكى قاجەتتىلىكتى تولىق قامتاماسىز ەتۋگە جەتكىلىكتى.
