مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى قابىلدادى، دەپ “ادىرنا” اقورداعا سىلتەمە جاساپ حابارلايدى.
بۇگىن پرەزيدەنت قاسىم-جومارت توقاەۆ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسىن اسحات جۇماعاليدى قابىلداپ، بايانداماسىن تىڭدادى.
باياندامادان:
- سىبايلاس جەمقورلىق تاۋەكەلدەرىنە سىرتتان تالداۋ جۇرگىزۋ كەزىندە جەردى ءبولۋ جانە الماتىنىڭ قالا قۇرىلىسىن دامىتۋ ءىسىن جوسپارلاۋ بارىسىندا ءجيى قايتالاناتىن زاڭ بۇزۋشىلىقتارعا جول بەرىلگەنى انىقتالعان;
- ءبىلىم بەرۋ سالاسىنداعى بيۋدجەتتىك وتىنىمدەردى ازىرلەۋ تەتىكتەرىنىڭ جەتىلدىرىلمەگەنىنە، قىزمەتكەرلەردى ءبىر ورتالىقتان ەسەپكە الۋدىڭ بولماۋىنا جانە قارجى جىمقىرۋعا اكەپ سوقتىرعان بۋحگالتەرلىك جۇيەلەردىڭ قازىناشىلىقتاعى دەرەكتەر بازاسىمەن بىرىكتىرىلۋىنە بايلانىستى تاۋەكەلدەر انىقتالعان;
- كاسىپكەرلىكتى دامىتۋعا كەدەرگى كەلتىرەتىن اكىمشىلىك توسقاۋىلداردى جويۋ ءۇشىن «بيزنەسكە جول» جوباسىن جۇزەگە اسىرۋ ءىسى جالعاساتىنىن، سونىمەن قاتار بۇل باستاما قولعا الىنعان ساتتەن بەرى 21 مىڭ بيزنەس سۋبەكتىسىنە كومەك كورسەتىلىپ، 400-دەن استام تۇيتكىلدى كەيس شەشىمىن تاپقان;
- بيىلعى 6 ايدا 130 نىسانعا تالداۋ جانە مونيتورينگ جۇرگىزىلگەنى، جەمقورلىقتى جويۋعا قاتىستى 1000-نان استام ۇسىنىس ەنگىزىلگەن;
- سوتقا دەيىنگى اياقتالعان تەرگەۋ امالدارىنىڭ ناتيجەسى بويىنشا 232,6 ميلليارد تەڭگە وتەلگەن;
- 1,5 جىلدا بيۋدجەتكە جانە كۆازيمەملەكەتتىك سەكتور سۋبەكتىلەرىنە شامامەن 860 ميلليارد تەڭگە كولەمىندە مۇلىكتىك اكتيۆتەر مەن اقشالاي قاراجات قايتارىلعان.
اعىمداعى جىلدىڭ باسىنان بەرى ەلىمىزدە 1000-عا جۋىق سىبايلاس جەمقورلىققا قاتىستى قىلمىس تىركەلىپ، 700-دەن استام ادام اشكەرەلەنگەنى بەلگىلى بولدى. ونىڭ 98-ءى ءتۇرلى دەڭگەيدەگى باسشىلاردىڭ قىلمىسى.
وسى تۇستا قاسىم-جومارت توقاەۆ سىبايلاس جەمقورلىققا قارسى جۇيەلى جۇمىستاردى جالعاستىرۋ قاجەتتىگىن، اسىرەسە الەۋمەتتىك ماڭىزى بار سالالارعا باسا ءمان بەرۋدى مىندەتتەدى. سونداي-اق الدىن الۋ شارالارىنىڭ اسا ماڭىزدى ەكەنىن ايتتى.
