اتىراۋ قالاسىنىڭ 62 جاستاعى تۇرعىنى مارات مۇحانبەتاليەۆكە ءبىرىنشى توپتاعى مۇگەدەكتىگى مەن دەنساۋلىق جاعدايىنىڭ اۋىرلىعىنا قاراماستان، دارىگەرلىك-ەڭبەك كوميسسياسى كومەكتەسۋدەن باس تارتتى. بۇل تۋرالى «اقجايىق» باسىلىمى جازدى، دەپ حابارلايدى “ادىرنا”.
«جارتى جىلدان اسا ۋاقىت كابينەتتەن كابينەتكە جۇگىرىپ ءجۇرمىن. بىردە ەمحاناعا، بىردە قايتادان باسقا جەرگە جىبەرەدى. ەڭبەك كوميسسياسى «قۇقىعىمىز جوق» دەپ جاۋاپ بەرەدى. قۇجات دۇرىس تولتىرىلماعان دەيدى، بىراق ول شىندىققا جاناسپايدى. تراۆماتولوگ قارادى، مەدتەكسەرۋدەن ءوتتىم – ءبارىبىر ناتيجە جوق. شارشادىم»، – دەيدى ول.
بۇل ماسەلە جاقىندا ونىڭ قاتىسۋىنسىز قارالعان. كوميسسيا شەشىمىندە ول دەنساۋلىعىنا بايلانىستى قاتىسا العان جوق دەپ كورسەتىلگەن. ال ماراتتىڭ ايتۋىنشا، شاقىرۋ الماعان، شاقىرتۋ جىبەرگەندە ارنايى بارىپ قاتىسۋ مۇمكىندىگى بولعان.
«سوندا مەنىڭ ورنىما ءبارىن شەشىپ قويعان. ال مەن جينالىس وتكەنىن دە بىلگەن جوقپىن»، – دەپ اشۋلاندى ول.
اربادان بولەك، ەر ادامعا جورگەك سياقتى قاراپايىم كۇتىم قۇرالدارى دا بەرىلمەگەن. ولاردى تەك ەلورداداعى قۇرىلىمدار ارقىلى الۋعا تۋرا كەلگەن.
رەداكتسيا جولداعان ساۋالعا جاۋاپ رەتىندە قر ەڭبەك جانە حالىقتى الەۋمەتتىك قورعاۋ مينيسترلىگىنە قاراستى حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ اتىراۋ وبلىسى بويىنشا دەپارتامەنتى تۇسىنىكتەمە بەردى. وندا مۇگەدەكتەردى ارناۋلى تەحنيكالىق قۇرالدارمەن، سونىڭ ىشىندە ەلەكترجەتەكتى كرەسلو-اربالارمەن قامتاماسىز ەتۋ جەكە وڭالتۋ باعدارلاماسىنا جانە ءماس كوميسسياسىنىڭ شەشىمىنە سايكەس جۇزەگە اسىرىلاتىنى ايتىلعان.
مۇحانبەتاليەۆتىڭ جاعدايىندا ەلەكترلى اربانى قولدانۋعا قارسى كورسەتىلىمدەر انىقتالعاندىقتان، كوميسسيا ونى ۇسىنباعان.
«مەن ەندى كابينەت جاعالاپ جۇرە المايمىن. قالاي دالەلدەيمىن – قولىم مەن اياعىم جوق قوي. مىنە... جوق. وزدەرى كورسە بولدى عوي»، – دەيدى ول.
