كەشە قاتتى جاۋعان جاۋىننىڭ سالدارىنان بادام مەن سايرام سۋ وزەندەرى ارناسىنان اسىپ، شىمكەنتتىڭ بىرقاتار اۋماعىن سۋ باسقان بولاتىن. قازىرگى تاڭدا نوسەر جاۋىنعا تاپ بولعان ەلتاي جانە قاراباستاۋ ەلدىمەكەندەرىندە دەر كەزىندە ءتيىستى كومەك كورسەتىلىپ، قاۋىپتىڭ الدىن الۋ جۇمىستارى جۇرگىزىلۋدە. بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا وتكەن بريفينگتە شىمكەنت قالالىق توتەنشە جاعدايلار دەپارتامەنتىنىڭ باستىعى، ازاماتتىق قورعاۋ پولكوۆنيگى ن.دەربىسوۆ مالىمدەدى.
- 13 مامىردا ساعات 19:14 مينۋت ۋاقىتىندا ەڭبەكشى اۋدانىنىڭ، ەلتاي ەلدى مەكەنىنە قاتتى جاۋىن-شاشىن سالدارىنان تاۋ باۋرايلارىنان 4 باعىتتان سۋ كەلگەن. ناتيجەسىندە ارىق جۇيەسى ىستەن شىعىپ، ۇيلەردىڭ اۋلاسىنا زالالى ءتيدى. جالپى 60 تۇرعىن ءۇي اۋلالارى مەن 60 شارۋاشىلىق قۇرىلىسىن سۋ باسقان. ونىڭ ىشىندە 24 تۇرعىن ءۇيدى سۋ الىپ، سالدارىنان بەس شارۋاشىلىق قۇرىلىس قيرادى. قازىرگى ۋاقىتتا دەپارتامەنت ماماندارىنىڭ كومەگىمەن سۋ سورۋ جۇمىستارى جۇرگىزىلدى، جەرگىلىكتى اتقارۋشى ورگان قىزمەتكەرلەرىنىڭ كۇشتەرىمەن ارىقتاردى مەحانيكالىق تازارتۋ جۇمىستارى اتقارىلۋدا، - دەدى ن.دەربىسوۆ.
دەپارتامەنت باستىعىنىڭ بايانداۋىنشا، 60 تۇرعىن ءۇيدىڭ تۇرعىنى ەجپ-نە (ەۆاكۋاتسيالىق جينالۋ پۋنكتەرى) 150-گە جۋىق تۇرعىن تۋىسقاندارىنا ەۆاكۋاتسيالانعان. ەلتاي ەلدى مەكەنى ورنالاسقان №120 ورتا مەكتەبى مەن ماياتاس ەلدى مەكەنىندە ورنالاسقان №119 ورتا مەكتەپتە كومەك كورسەتىلدى. قازىرگى تاڭدا جالپى 331 ادام كوشىرىلگەن. قازا تاپقاندار مەن جاراقاتتانعاندار جوق.
سونداي-اق، بۇگىن، ياعني 14 مامىر كۇنى ساعات 01.14-تە ەڭبەكشى اۋدانىنىڭ، وتكورم.سوۆحوزىنىڭ گاۋحار تاس كوشەسىندە قاتتى جاۋىن-شاشىن سالدارىنان بادام وزەنىنىڭ سۋى تاسىعان. جاعالاۋدىڭ بۇزىلۋى سالدارىنان 2 تۇرعىن ءۇيدىڭ قۇلاۋىنا قاۋىپ توندىرگەن (ۇيلەرگە دەيىن 7-8 مەتر اراقاشىقتىق).
- دەپارتامەنت قىزمەتكەرلەرىنىڭ كومەگىمەن قاۋىپ ءتونىپ تۇرعان 2 ءۇيدىڭ 17 تۇرعىنى №84 ورتا مەكتەبىنە ەۆاكۋاتسيالاندى. قازا تاپقاندار جانە جاراقاتتانعاندار جوق. وسىنداي جاعداي، بادام وزەنىنىڭ جاعاسىندا ورنالاسقان قاراباستاۋ ەلدى مەكەنىندەگى ساياجاي كوشەسىندەگى ۇيلەرىندە دە ورىن الىپ، جالپى 13 ازامات كوشىرىلدى، ونىڭ ىشىندە 6 بالا بار. جالپى توتەنشە جاعداي سالدارىن جويۋعا دەپارتامەنتتىڭ 133 قىزمەتكەرى مەن 14 دانا تەحنيكا، 19 دانا مپ-100 موتوپومپالار جۇمىلدىرىلدى. ودان بولەك، كوممۋنالدىق قىزمەتتەن 46 قىزمەتكەر، 31 دانا تەحنيكا، ۇلتىق ۇلان 100 قىزمەتەكەرى جانە 4 دانا تەحنيكا تارتىلدى، - دەدى ن.دەربىسوۆ.
ايتا كەتەرلىگى، 112 كەزەكشىلىك قىزمەتىنە تۇرعىنداردان سۋ باسۋ قاۋپىنە بايلانىستى 28 قونىراۋ تۇسكەن. بارلىعىن دا شۇعىل تۇردە قىزمەتكەرلەر نازارعا الىپ، 973 تەكشە مەتر سۋ سورىلعان. جالپى 97 ادام جەكە قۇرام، 23 تەحنيكا جۇمىلدىرىلعان.
ەسكە سالا كەتسەك، كازگيدرومەت ورتالىعىنىڭ مالىمەتتەرىنە سايكەس، جاۋىن-شاشىن اپتا سوڭىنا دەيىن جالعاسادى. بۇل رەتتە دەپارتامەنتتە تاۋلىك بويى جۇمىس ىستەيتىن ارنايى شتاب قۇرىلعان. قازىرگى ۋاقىتتا كەلتىرىلگەن شىعىن كولەمى انىقتالۋدا، بارلىق جاعداي تۇراقتى باقىلاۋعا الىنعان.
شىمكەنت
