شىمكەنتتەگى بوزارىق شاعىناۋدانىنان بوي كوتەرگەن جاڭا يپپودرومنىڭ قۇرىلىسى تەحنيكالىق تۇرعىدان اياقتالىپ، قالاداعى ارنايى ات سپورتى مەكتەبىنىڭ شاكىرتتەرى جاتتىعۋلارىن باستادى. شاھار باسشىسى مۇرات ايتەنوۆ نىسان باسىنا بارىپ، جوبا جەتەكشىسى جانە جاس سپورتشىلارمەن كەزدەسىپ، پىكىرلەستى. اتقارىلۋعا ءتيىس وزگە دە جۇمىستاردىڭ بارىسىن كوردى.
مۇرات دۇيسەنبەكۇلى يپپودروم شاھاردىڭ ەڭ كورىكتى جەرلەرىنىڭ بىرىنە اينالاتىنىن ايتا كەلە، نىسان قۇرىلىسىنىڭ حالىقارالىق تالاپقا ساي جۇرگىزىلگەنىن جانە جاڭا اتشابار ات سپورتى جانە ۇلتتىق سپورت تۇرلەرىن قالامىزدا عانا ەمەس، رەسپۋبليكا دەڭگەيىندە دامىتۋعا بىردەن-ءبىر سەپ بولاتىنىن جەتكىزدى.
جوبا جەتەكشىسى ايدىن جاكەجانوۆ: «جوبانى اياقتاۋعا بار كۇش-جىگەرىن سالعان ۇجىمىما العىس ايتامىن. ءبىزدىڭ سىيلىعىمىز تۇرعىندارعا ۇنايدى دەگەن ۇمىتتەمىز. رەسمي اشىلۋىن ناۋرىزدا جاساۋدى جوسپارلادىق»-دەدى.
اتشابار قۇرىلىسىندا 20 مەردىگەر كومپانيا 500-دەن استام جۇمىس قولى جۇمىلدىرىلعان.
يپپودروم 1500 كورەرمەنگە ارنالعان. ات ارەناسى بار مانەجدەردەن باسقا 53 ات قورا، جابىق ستەند عيماراتى، ۆەتەرينارلىق بلوك، كومەكشى بولمەلەر، 310 كولىككە ارنالعان كەڭ تۇراق قاراستىرىلعان. تريبۋنانىڭ جوعارعى قاباتىندا اشىق تەرراسا بار. جىلقىلار مەن شاباندوزداردىڭ قاۋىپسىزدىگى ءۇشىن ارنايى امورتيزاتسيالىق قورشاۋمەن قورشالعان ۇزىندىعى 2012 مەتر جارىس جولى سالىندى.
سونداي-اق، كوكپار مەن اتپەن سەكىرۋگە ارنالعان الاڭى دا بار. ول الاڭدار كۆارتستى قۇمىمەن تولتىرىلىپ، تابيعي تاستارمەن، جاسىل جەلەكپەن ەرەكشەلەنەتىن بولادى.
"ادىرنا" ۇلتتىق پورتالى
