سۋ تاسقىنى ورىن العان وڭىرلەردە قازىرگى ەسەپ بويىنشا 8,1 مىڭ باس مال قىرىلعان، دەپ حابارلايدى "ادىرنا" ءتىلشىسى.
قىرىلعان مال يەلەرى وتەماقى الا الادى. بۇل تۋرالى اۋىل شارۋاشىلىعى مينيسترلىگىنىڭ رەسمي وكىلى ولجاس تىلەبالدين 10 ءساۋىر كۇنى وتكەن بريفينگتە ايتتى. ونىڭ سوزىنشە وبلىس اكىمدىكتەرى مەن اۋىل شارۋاشىلىعى مينيسترلىگىنىڭ بىرلەسكەن جۇمىسىنىڭ ارقاسىندا 88 مىڭنان استام اۋىل شارۋاشىلىعى جانۋارلارىن قاۋىپسىز جەرگە شىعارىلعان.
"جەدەل دەرەكتەر بويىنشا ولگەن مال سانى 8,1 مىڭ باس، ونىڭ ىشىندە ۇساق مال – 6 مىڭ، ءىرى قارا – 1,5 مىڭ، جىلقى – 514 باس. رەسپۋبليكالىق ەپيزووتياعا قارسى وترياد تۇراقتى ەپيزووتيالىق جاعدايدى ساقتاۋ ماقساتىندا جانۋارلاردىڭ ولەكسەلەرىن جويۋ جۇمىستارىن قارقىندى جالعاستىرۋدا. بۇگىنگى تاڭدا 4,1 مىڭ مال ولەكسەلەرى جويىلدى. پرەمەر-ءمينيستردىڭ تاپسىرماسى بويىنشا بۇل جۇمىس كۇشەيتىلگەن رەجيمدە جالعاساتىن بولادى. سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زارداپتارىن جويۋ جونىندەگى رەسپۋبليكالىق شتابپەن ولگەن مال يەلەرىنە وتەماقى تولەۋ الگوريتمىن ازىرلەپ، بەكىتىلدى. مەنشىك يەلەرى مەن زالالدى انىقتاۋ جانە باسقا دا ماسەلەلەردى شەشۋ ءۇشىن وڭىرلەردە جەرگىلىكتى اتقارۋشى ورگاندارمەن شىعىندى انىقتاۋ جونىندەگى كوميسسيا قۇرىلدى”، – دەدى ولجاس تىلەبالدين.
مال يەلەرى مالىمەتتەردى كورسەتە وتىرىپ، جەرگىلىكتى كوميسسياعا ءوتىنىش بەرۋى كەرەك. مەنشىك قۇقىعى كوميسسيالاردىڭ اكتىلەرىمەن راستالادى. ال مەنشىك يەلەرىنە وتەماقى ۇلتتىق ستاتيستيكا بيۋروسى جاريالاعان تالاپقا ساي بەرىلەدى.
