رەسپۋبليكا كۇنى قارساڭىندا شىمكەنت قالاسىندا تۇڭعىش رەت ەل تاريحى مەن زاماناۋي ونەردى توعىستىرعان «بۇگىنگى قازاقستان» اتتى اۋقىمدى مۋلتيفورماتتى مۋزىكالىق-تەاترلاندىرىلعان قويىلىم ساحنالاندى.
«شىمكەنت كونتسەرت» كونتسەرتتىك ۇيىمى ۇسىنعان بۇل تۋىندى تاۋەلسىزدىك جىلدارىمەن تاعدىرلاس ءبىر اۋلەتتىڭ ءومىر جولىن ارقاۋ ەتىپ، كورەرمەنگە ەرەكشە رۋحاني اسەر سىيلادى. 
قويىلىمنىڭ باستى يدەياسى – قازاقستاننىڭ تاۋەلسىزدىك العان جىلداردان بەرگى 35 جىلدىق دامۋ جولىن ساحنالىق ونەر ارقىلى بەينەلەۋ. ميۋزيكلدىڭ باس كەيىپكەرى ءادىل 1991 جىلدىڭ 16 جەلتوقسانىندا – ەل تاۋەلسىزدىگى جاريالانعان كۇنى دۇنيەگە كەلەدى. ونىڭ ەسەيۋ كەزەڭدەرى جاس مەملەكەتتىڭ قالىپتاسۋىمەن، ىرگەلى وزگەرىستەرىمەن قاتار ءوربيدى.
قويىلىم جەلىسىندە ۇلتتىق ۆاليۋتا – تەڭگەنىڭ اينالىمعا ەنۋى، مەملەكەتتىك رامىزدەردىڭ بەكىتىلۋى، استانانىڭ بوي كوتەرۋى، 2020 جىلعى پاندەميا كەزىندەگى دارىگەرلەردىڭ قايسار ەرلىگى جانە كەيىنگى جىلدارى قولعا الىنعان «تازا قازاقستان» جالپىۇلتتىق ەكولوگيالىق باستاماسى سياقتى تاريحي بەلەستەر شىنايى ءارى اسەرلى بەينەلەنگەن.
– بۇل اۋقىمدى جوبانى دايىنداۋعا ءبىر ايعا جۋىق ۋاقىت كەتتى. قويىلىمنىڭ اۋقىمى وتە كەڭ، سەبەبى مۇندا تەك تەاتر ونەرى ەمەس، زاماناۋي مۋزىكا، حورەوگرافيا جانە اۋقىمدى LED-تەحنولوگيالار ءبىر ارناعا توعىستى. ءاربىر كورەرمەن وسى ساحنادان ءوز ءومىرىنىڭ ءبىر بولشەگىن، ەلدىڭ دامۋ جولىن كورە السىن دەپ بار كۇشىمىزدى سالدىق، - دەدى قويىلىم رەجيسسەرى مەدەت اعابىلوۆ
«بۇگىنگى قازاقستان» – بۇل تەاتر، ميۋزيكل، حورەوگرافيا، LED-تەحنولوگيالار جانە زاماناۋي رەجيسسۋرا توعىسقان سينتەزدى ونەر تۋىندىسى. ساحنادا 140-قا جۋىق ونەرپاز – اكتەرلەر، بيشىلەر مەن ۆوكاليستەر ونەر كورسەتتى.
جوبانىڭ باستى ەرەكشەلىكتەرىنىڭ ءبىرى بارلىق مۋزىكالىق تۋىندىلار مەن اندەردىڭ جاندى داۋىستا ورىندالۋىندا. انشىلەر مەن ۆوكاليستتەردىڭ ورىنداۋىن «Qazaq groove project» ۆوكالدى-اسپاپتىق ءانسامبلى سۇيەمەلدەپ، ساحناداعى اسەردى ارتتىرا ءتۇستى.
– مۇنداي فورماتتاعى جوبادا تۇڭعىش رەت جۇمىس ىستەۋدەمىز. بۇل قويىلىمعا ارنايى مۋزىكالار جازىلدى، ارنايى ارانجيروۆكالار جاسالدى. مۋزىكالىق سۇيەمەلدەۋ مەن انشىلەردىڭ داۋىسى ءبىرتۇتاس ۇيلەسىم تاۋىپ، كورەرمەنگە ەرەكشە اسەر سىيلادى دەپ ويلايمىن، -دەدى «Qazaq groove project» ۆوكالدى-اسپاپتىق ءانسامبلىنىڭ كوركەمدىك جەتەكشىسى جاندوس اپپازوۆ.
سونىمەن قاتار، قويىلىمنىڭ ءاربىر ءبولىمى ءۇشىن ارنايى دايىندالعان LED-كونتەنت ساحنالىق دەكوراتسيامەن شەبەر ۇيلەستىرىلىپ، وتكەن مەن بۇگىننىڭ اراسىن ەرەكشە سۋرەتتەي ءبىلدى. بيشىلەر توبىنىڭ ۇيلەسىمدى پلاستيكاسى مەن ساحنالىق قيمىلدارى قويىلىمنىڭ ديناميكاسىن اشا ءتۇستى.
ميۋزيكل تەك وتكەنگە شولۋ جاساپ قانا قويماي، ادال ەڭبەك، ۇرپاقتار ساباقتاستىعى، وتانسۇيگىشتىك پەن ادىلەتتى قوعام قۇرۋ يدەيالارىن دارىپتەيدى. وقۋىن استانادا اياقتاپ، تۋعان قالاسىنا ورالعان كەيىپكەردىڭ تاڭداۋى ارقىلى ءاربىر ازاماتتىڭ ەل دامۋىنا قوساتىن ۇلەسى ماڭىزدى ەكەنىن كورسەتە ءبىلدى.
كەش سوڭىندا بارلىق ونەرپازدار مەن كورەرمەندەر بىرگە شىرقاعان پاتريوتتىق تۋىندىلار زالداعى حالىقتىڭ اسقاق رۋحى مەن مەرەكەلىك اتموسفەراسىن ايشىقتاي ءتۇستى. رەسپۋبليكا كۇنىنە ارنالعان بۇل شارا شىمكەنتتىڭ مادەني ءومىرىن تاعى ءبىر بەلەسكە بيىكتەتتى.
