العاش رەت دەمىكپەگە قارسى دۇنيەجۇزىلىك كۇرەس كۇنى 1988 جىلى اتاپ ءوتىلدى. وتكىزۋ ماقساتى - جالپى وسى اۋرۋ تۋرالى پاتسيەنتتەردىڭ، دارىگەرلەردىڭ جانە تۇرعىنداردىڭ اقپارات الۋىن جاقسارتۋ، برونح دەمىكپەسى بار پاتسيەنتتەردىڭ ماسەلەسىن شەشۋگە جانە ولارعا كورسەتىلەتىن مەديتسينالىق كومەكتىڭ ساپاسىن جاقسارتۋعا قوعام نازارىن اۋدارتۋ.
برونح دەمىكپەسى – بۇل قابىنۋ، ءىسىنۋ جانە قاقىرىق پايدا بولۋ سالدارىنان دۇرىس تىنىس الۋعا كەدەرگى كەلتىرەتىن، سونىڭ ناتيجەسىندە وكپەگە اپاراتىن تىنىس الۋ جولدارىن تارىلتاتىن اۋىر دەرت.
ستاتيستيكالىق دەرەكتەرگە سايكەس 2019 جىلى قازاقستاندا برونح دەمىكپەسىنىڭ 108 958 جاعدايى تىركەلدى، ونىڭ ىشىندە 19 040 جاعداي العاش رەت تىركەلىپ وتىر.
79 058 ادام ديسپانسەرلىك ەسەپتە تۇر، ونىڭ ىشىنەن 17 جاسقا دەيىنگى برونح دەمىكپەسى بار بالالاردىڭ ۇلەسى 22,7% قۇرايدى.
اۋرۋ، ادەتتە، جاس كەزىنەن باستالادى. شامامەن بالالاردىڭ 50%-ى ونى دۇرىس ەمدەگەن جاعدايدا ەسەيگەن ۋاقىتىندا دەمىكپە اۋرۋىنان جازىلىپ جاتادى.
قر دسم قوعامدىق دەنساۋلىق ساقتاۋ ۇلتتىق ورتالىعىنىڭ ساراپشىلارى برونح دەمىكپەسى كەزىندە اسقىنۋدىڭ الدىن الۋ ءۇشىن بەلگىلى ءبىر قاعيدالاردى ۇستانۋدى ۇسىنادى.
دەمىكپە كەزىندە نەنى جەۋگە بولمايدى: بالىق ونىمدەرى، تەڭىز ونىمدەرى، ۋىلدىرىق، ەتتىڭ مايلى سورتى ء(ۇي قۇسى، شوشقا ەتى), قاقتالعان تاعامدار، مايلى تاعامدار، جۇمىرتقا، بۇرشاق ونىمدەرى، جاڭعاق، شوكولاد، بال، تومات، قىزاناقتان جاسالعان سوۋستار، اشىتقىدان جاسالاتىن تاماقتار، تسيترۋستار (اپەلسين، ليمون، ماندارين، پومەلو، گرەيپفرۋتتار), قۇلپىناي، تاڭقۋراي، قاراقات، ورىك، شابدالى، قاۋىن، الكوگول.
نەنى قولدانۋدى شەكتەۋ قاجەت: جوعارى سۇرىپتى ۇننان جاسالعان نان-توقاش ونىمدەرى، توقاشتار، قانت پەن تۇز، ءسۇت ونىمدەرى ء(سۇت، قايماق، سۇزبە).
دەمىكپە كەزىندە نەنى جەۋگە بولادى: بوتقا (مايمەن), سورپا (مايسىز), تاۋىق ەتى، مايسىز سوسيسكالار مەن شۇجىق (دوكتورلىق), قارا بيداي نانى، كەبەكتەن جاسالعان نان، سۇلىدان نەمەسە گالەتتەن جاسالعان پەچەنە، كوكونىستەن جانە جەمىستەردەن جاسالعان سالاتتار، كومپوت، مينەرالدى سۋ، شاي، كوفە (قۇرامىندا كوفەين بولسا).
تاماقتانۋ ءتارتىبى – قاتتى تويماي، كۇنىنە 4-5 رەت تاماق جەۋ. تاماقتى بۋمەن پىسىرگەن دۇرىس، بىراق قايناتۋعا، بۇقتىرۋعا، قىزدىرىپ پىسىرۋگە دە بولادى. تاماقتى تەك جىلى كۇيىندە جەۋ قاجەت.
دەمىكپەنىڭ اسقىنۋى
- پنەۆموتوراكس (وكپەقاپ قۋىسىنا اۋانىڭ ءتۇسۋى)
- جەدەل تىنىس جەتىسپەۋشىلىگى
- وكپەنىڭ ەمفيزەماتوزدى بۇزىلىسى
برونح دەمىكپەسى سوزىلمالى اۋرۋ ەكەندىگىنە قاراماستان، ونى تولىعىمەن باقىلاۋدا ۇستاۋعا بولادى. دەمىكپەنى جاقسىلاپ باقىلاۋ سىزگە اۋرۋ بەلگىلەرىن جويىپ، اسقىنۋدىڭ پايدا بولۋ قاۋپىن تومەندەتىپ قانا قويماي، ءومىر ءسۇرۋ ساپاسىن جاقسارتۋعا جانە قالاعان نارسەڭىزدى ىستەۋگە مۇمكىندىك بەرەدى.
اۋرۋدىڭ الدىن الۋ ءۇشىن قوعامدىق دەنساۋلىق ساقتاۋ ۇلتتىق ورتالىعىنىڭ ساراپشىلارى ۇسىنعان كەڭەس:
- ۇستامالاردى توقتاتۋ ءۇشىن وزىمەن بىرگە ۇنەمى ينگالياتوردى الىپ ءجۇرۋ;
- باستالىپ كەلە جاتقان ۇستاما بەلگىلەرىن ءبىلىپ، ونى توقتاتۋدى ۇيرەنۋ;
- اۋرۋ قوزدىراتىن فاكتورلاردان اۋلاق بولۋ;
- مىندەتتى تۇردە دارىگەردىڭ ەم بويىنشا بەرگەن كەڭەستەرىن ورىنداۋ;
- كوڭىل-كۇيىڭىز جاقسى بولسا دا، دارىگەرگە جىلىنا كەمىندە 2 رەت بارۋ;
- ۇيدەگى تازالىقتى قاداعالاۋ جانە كەز كەلگەن اللەرگەندى جويۋ: شاڭ-توزاڭ، جانۋارلاردىڭ ءجۇنى، كەنە جانە ت. ب.;
- تەمەكى تۇتىنىنەن، گاز تۇتىنىنەن اۋلاق ءجۇرۋ. ەگەر تەمەكى شەگەتىن بولساڭىز، ونى تاستاڭىز;
- ۇستامالار جيىلىگىن ازايتۋ ءۇشىن بارلىق تاعايىندالعان پرەپاراتتاردى قابىلداۋ;
- جۇرەك پەن وكپە جاعدايىن جاقسارتۋ ءۇشىن سپورتپەن شۇعىلدانۋ.
جالپى برونح دەمىكپەسىن ەمدەۋ كەزىندەگى بولجام وڭ ناتيجەلى بولادى، الايدا كوپ جاعدايدا اۋرۋدىڭ انىقتالعان دەڭگەيىنە، مۇقيات دياگنوستيكالاۋعا، پاتسيەنتتىڭ ەمدەۋشى دارىگەر بەرگەن بارلىق ۇيعارىمدارىن ناقتى ورىنداۋىنا جانە اتالعان اۋرۋ ۇستاماسىن تۋدىرۋى مۇمكىن فاكتورلاردى شەكتەۋگە بايلانىستى بولادى.
ءوزىڭىزدى كۇتىڭىز جانە اۋىرماڭىزدار!
قوعامدىق دەنساۋلىق ساقتاۋ ورتالىعى
