اقش پرەزيدەنتى دونالد ترامپ وسى اپتادا ەكىنشى پرەزيدەنتتىك مەرزىمى اياسىندا العاش رەت ۆەتو قۇقىعىن پايدالاندى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
ول كونگرەسس ەكى پارتيانىڭ دا قولداۋىمەن قابىلداعان ەكى زاڭ جوباسىنا قول قويۋدان باس تارتتى.
العاشقى ۆەتو كولورادو شتاتىنىڭ وڭتۇستىك-شىعىس بولىگىن تازا اۋىزسۋمەن قامتاماسىز ەتۋگە ارنالعان اركانزاس اڭعارىنداعى سۋ قۇبىرىنىڭ قۇرىلىسىن اياقتاۋ تۋرالى زاڭ جوباسىنا قاتىستى بولدى. دونالد ترامپ بۇل جوبانىڭ ۇزاققا سوزىلعانىن جانە تىم قىمباتقا تۇسەتىنىن اتاپ ءوتتى.
"جەتەرى جەتتى. مەنىڭ اكىمشىلىگىم امەريكالىق سالىق تولەۋشىلەردىڭ قارجىسىن قىمبات ءارى سەنىمسىز ساياساتقا جۇمساۋعا جول بەرمەيدى", — دەپ جازدى ترامپ.
زاڭ جوباسىنىڭ اۆتورى، كولورادو شتاتىنان سايلانعان رەسپۋبليكالىق كونگرەسسمەن لورەن بوبەرت الەۋمەتتىك جەلىدە «بۇل ءالى سوڭى ەمەس» دەپ مالىمدەدى.
ال دەموكرات-سەناتور دجون حيكەنلۋپەر ترامپتى «پارتيالىق ويىن جۇرگىزىپ، كولورادونى جازالادى» دەپ ايىپتاپ، كونگرەسستى ۆەتونى جويۋعا شاقىردى. ۆەتونى ەڭسەرۋ ءۇشىن كونگرەستىڭ ەكى پالاتاسىندا دا ۇشتەن ەكى داۋىس قاجەت.
ترامپ ۆەتو قويعان ەكىنشى زاڭ جوباسى فلوريدا شتاتىنداعى ميككوسۋكي قورىق ايماعىن كەڭەيتۋگە قاتىستى بولدى. قۇجاتقا سايكەس، قورىق اۋماعىنا ەۆەرگلەيدس ۇلتتىق پاركىنىڭ ءبىر بولىگى قوسىلۋى ءتيىس ەدى.
ۆەتونىڭ سەبەپتەرىن تۇسىندىرەتىن حاتىندا دونالد ترامپ ميككوسۋكي تايپاسىن «اقىلعا قونىمدى كوشى-قون ساياساتىنا كەدەرگى كەلتىرۋگە تىرىستى» دەپ ايىپتادى. ونىڭ ايتۋىنشا، بۇل ساياساتتى امەريكالىق حالىق سايلاۋ كەزىندە ايقىن قولداعان.
ايتا كەتەيىك، دونالد ترامپ العاشقى پرەزيدەنتتىك مەرزىمىندە 10 زاڭ جوباسىنا ۆەتو قويعان، ولاردىڭ تەك بىرەۋى عانا كونگرەسس تاراپىنان جويىلعان.
