گەرمانيادا بانكتەگى سەيفتەردەن قىرۋار قارجى ۇرلانعان، دەپ حابارلايدى "ادىرنا" ۇلتتىق پورتالى.
گەرمانيانىڭ باتىسىنداعى گەلزەنكيرحەن قالاسىندا بەلگىسىز بىرەۋلەر جاڭا جىل مەرەكەسىن پايدالانىپ، بولشەك ساۋدا بانكى بولىمشەسىنىڭ قويماسىنا زاڭسىز كىرگەن.
قاسكويلەر تۇتىنۋشىلاردىڭ سەيفتىك جاشىكتەرىنەن كەمىندە 10 ميلليون ەۋرو كولەمىندە قولما-قول اقشا مەن قۇندى زاتتاردى ۇرلاعان.
پوليتسيا مالىمەتىنشە، قىلمىسكەرلەر بانك بولىمشەسىنىڭ قالىڭ بەتون قابىرعاسىن بۇرعىلاپ تەسىپ، بىرنەشە مىڭ سەيفتىك جاشىكتى بۇزعان. ۇرلانعان قاراجاتتىڭ جالپى سوماسى ونداعان ميلليون ەۋروعا جەتۋى مۇمكىن.
گەرمانيادا دۇكەندەر مەن بانكتەردىڭ باسىم بولىگى روجدەستۆولىق مەرەكەلەرگە بايلانىستى 24 جەلتوقسان كەشىنەن باستاپ جابىلادى. ال قۇقىق قورعاۋ ورگاندارى قابىرعاداعى تەسىكتى تەك 29 جەلتوقسان كۇنى تاڭەرتەڭ ءورت دابىلى ىسكە قوسىلعاننان كەيىن انىقتاعان.
پوليتسيانىڭ حابارلاۋىنشا، سەنبى كەشىندە كۋاگەرلەر كورشى كوپقاباتتى اۆتوتۇراقتىڭ باسپالداعىمەن بىرنەشە ەر ادامنىڭ ۇلكەن سومكەلەردى الىپ جۇرگەنىن كورگەن. سونداي-اق دۇيسەنبى كۇنى تاڭەرتەڭ گاراجدان بەتپەردە كيگەن ادامدار وتىرعان قارا ءتۇستى Audi RS 6 كولىگى شىققانى تۋرالى مالىمەت تۇسكەن.
انىقتالعانداي، كولىكتىڭ مەملەكەتتىك ءنومىرى گاننوۆەر قالاسىندا، گەلزەنكيرحەننەن 200 شاقىرىمنان استام جەردە بۇرىن ۇرلانعان اۆتوكولىككە تيەسىلى بولعان.
