اقش-تىڭ ارنايى قىزمەتتەرى ۋكراينا ۇشقىشسىز ۇشۋ اپپاراتتارىنىڭ رەسەي پرەزيدەنتى ۆلاديمير پۋتينگە شابۋىل جاساعانى تۋرالى اقپاراتتى راستاعان جوق. بۇل تۋرالى The Wall Street Journal گازەتى جازدى، دەپ حابارلايدى «ادىرنا» ءتىلشىسى.
«ۋكراينا نوۆگورود وبلىسىندا ورنالاسقان اسكەري نىسانعا سوققى بەرۋگە تىرىسقان. الايدا ول نىسان ءپۋتيننىڭ رەزيدەنتسياسىنا جاقىن جەردە بولماعان»،- دەلىنگەن حابارلامادا.
باسىلىم دەرەككوزىنە سايكەس، مۇنداي قورىتىندىنى اقش ورتالىق بارلاۋ باسقارماسىنىڭ باعالاۋى دا راستاعان. بارلاۋ مالىمەتتەرى بويىنشا، ءپۋتيننىڭ رەزيدەنتسياسىنا شابۋىل جاساۋعا ەشقانداي ارەكەت بولماعان.
CNN مالىمەتىنشە، 31 جەلتوقساندا ورتالىق بارلاۋ باسقارماسىنىڭ ديرەكتورى دجون رەتكليفف وسى تۇجىرىمدار تۋرالى اقش پرەزيدەنتى دونالد ترامپقا حابارلاعان. سول كۇنى ترامپ Truth Social الەۋمەتتىك جەلىسىندە New York Post باسىلىمىنىڭ رەداكتسيالىق ماقالاسىنا سىلتەمە جاساپ، رەسەي بيلىگى تاراتقان پۋتين رەزيدەنتسياسىنا شابۋىل جاسالدى دەگەن اقپاراتتى «بەيبىتشىلىككە رەسەيدىڭ ءوزى كەدەرگى كەلتىرىپ وتىر» دەگەن ۋاجبەن بايلانىستىرعان.
بۇعان دەيىن رەسەيدىڭ سىرتقى ىستەر ءمينيسترى سەرگەي لاۆروۆ 29 جەلتوقساندا ۋكراينا تاراپىنان رەسەي پرەزيدەنتىنىڭ نوۆگورود وبلىسىنداعى رەزيدەنتسياسىنا دروندار ارقىلى شابۋىل جاساۋ ارەكەتى بولعانىن مالىمدەگەن ەدى. ونىڭ ايتۋىنشا، شابۋىلعا 91 ۇشقىشسىز ۇشۋ اپپاراتى قاتىسقان. ولاردىڭ بارلىعى اۋە شابۋىلىنا قارسى قورعانىس كۇشتەرىمەن جويىلعان.
ترامپتىڭ ءوزى دە پۋتينمەن تەلەفون ارقىلى سويلەسكەنىن جانە اڭگىمە بارىسىندا رەسەيلىك تاراپ رەزيدەنتسياعا شابۋىل جاسالعانى تۋرالى ايتقانىن جەتكىزدى. اقش پرەزيدەنتى بۇل حاباردى ەستىگەندە «قاتتى اشۋلانعانىن»، بىراق شابۋىلدىڭ مۇلدە بولماۋى دا مۇمكىن ەكەنىن جوققا شىعارماعانىن اتاپ ءوتتى.
31 جەلتوقساندا رەسەيدىڭ قورعانىس مينيسترلىگى پۋتين رەزيدەنتسياسىنا قاراي ۇشىپ كەلە جاتقاندا اتىپ ءتۇسىرىلدى دەلىنگەن درونداردىڭ قالدىقتارىن كورسەتكەن. الايدا ۋكراينا قارۋلى كۇشتەرى تاراپىنان شابۋىل جاسالعانىن تاۋەلسىز دەرەككوزدەر ءالى كۇنگە دەيىن راستامادى. ال ۋكراينا پرەزيدەنتى ۆلاديمير زەلەنسكي بۇل ايىپتاۋلاردى ءۇزىلدى-كەسىلدى جوققا شىعاردى.
