ارمەنيانىڭ پرەمەر-ءمينيسترى نيكول پاشينيان كەزەكتى رەت كوپشىلىكتىڭ نازارىن وزىنە اۋداردى، دەپ حابارلايدى "ادىرنا" ۇلتتىق پورتالى.
بۇل جولى ول بيلىكتەگى «ازاماتتىق كەلىسىم» پارتياسىنىڭ ءىس-شاراسىندا ەرەكشە قىلىعىمەن كوزگە ءتۇستى. ساياسي جيىن بىرتە-بىرتە جاڭا جىلدىق كورپوراتيۆتىك كەشكە ۇلاسقان.
قاتاڭ ساياسي وبرازدان الىستاپ كەتكەن ساياساتكەر بۇل جولى الەۋمەتتىك جەلىدە ءوزى بارابان اسپابىندا ويناپ وتىرعان بەينەجازبانى جاريالادى. ايتا كەتەيىك، پاشينيان ءوزى جازعان «ناعىز ارمەنيا — ارمەنيا رەسپۋبليكاسى» اتتى ولەڭىنە ارنالعان كومپوزيتسيانى ورىنداعان.
كەيىنىرەك ارمەنيانىڭ ەكونوميكا ءمينيسترى گەۆورگ پاپويان جۋرناليستەرگە بەرگەن سۇحباتىندا بارابان اسپابى پرەمەر-مينيسترگە سىيعا تارتىلعانىن جانە پاشينياننىڭ بىرنەشە اي بويى ويناۋدى ۇيرەنگەنىن ايتتى.
بۇدان سوڭ پرەمەر-مينيستر تاعى ءبىر بەينەجازبا جاريالاپ، بۇل جولى ارىپتەستەرىمەن بىرگە بي بيلەپ، ءان ايتتى. ۆيدەودا ول پارتيالاستارىمەن ءاننىڭ قايىرماسىن ورىنداعان. ءان ماتىنىندە: «قايدا بارساڭ دا، مەن سەنىمەن بارامىن. قاشان شاقىرساڭ — سوڭىنان ەرىپ جۇرەمىن» دەگەن جولدار ايتىلادى.
جەلى قولدانۋشىلارى بۇل ۆيدەولاردى ءارتۇرلى قابىلداپ، ءبىرى قولداسا، ەندى ءبىرى ساياساتكەردىڭ مۇنداي ەركىن ارەكەتىن سىنعا الدى.
