ەڭبەك جانە حالىقتى الەۋمەتتىك قورعاۋ ءمينيسترىنىڭ نازارىنا!
امەريكا توتەنشە جاعداي كەزىندە ءار ادام باسىنا اي سايىن 600 دوللارمەن (258 600 تەڭگە) كومەك كورسەتسە، قىتاي تابىسىنان ايىرىلعانداردىڭ 100% جالاقىسىن تولەپ وتىرادى ەكەن. جاڭا زەلانديانىڭ ۇكىمەتى كارانتيندە وتىرعان ازاماتتارىنا 585 جاڭا زەلانديالىق دوللاردى (151 585 تەڭگە) تاعايىنداسا، دانيادا مەملەكەت جۇمىسىنان ايىرىلعانداردىڭ 90% جالاقىسىن وتەيتىن كورىنەدى.
ال بىزدە 30 ساۋىردەن باستاپ 42500 تەڭگە ەكىنشى رەت بەرىلمەك. «ناعىز قاراجاتتان قىسىلعان ازاماتتار مەملەكەتتىك كومەكتەن قۇر قالىپ، ءبىر باسىندا بىرنەشە جۇمىسى بارلار، بىلايشا ايتقاندا «اۋزىنان مايى اعىپ وتىرعاندار» 42500 تەڭگەنى تاعى الماق» دەيدى تج كەزىندە تابىسىنان ايىرىلعان قازاقستان ازاماتتارى. بۇنىڭ سەبەبى نەدە؟ ۇكىمەتتىڭ جۇيەسىنىڭ قاتەلىگى مە؟ الدە بۇقارانىڭ ساۋاتسىزدىعى ما؟ كوپشىلىكتىڭ الەۋمەتتىك كومەكتەن قاعىلۋ سەبەپتەرى قانداي؟ وسى ماسەلەلەردى انىقتاپ كورۋ ماقساتىندا 42500 تەڭگەگە ناعىز مۇقتاج جانداردان «ادىرنا» ۇلتتىق پورتالى سۇحبات العان ەدى. اتالعان ماسەلەنى ەڭبەك ءمينيسترى ءبىرجان نۇرىمبەتوۆ نازارعا الادى دەگەن سەنىمدەمىز.
3-توپتاعى مۇگەدەك نۇرجان سىدىقوۆ:
مەن مەملەكەتتىك كومەك الۋ ءۇشىن بجت تولەدىم. 3-توپتاعى مۇگەدەك بولعاندىقتان 42 500 تەڭگە الاتىنىما سەنىمدى ەدىم. الايدا ماعان «مەملەكەتتەن مۇگەدەكتىگىڭىز ءۇشىن قاراجات الاتىندىقتان ءوتىنىمىڭىز باستارتىلدى» دەگەن حابارلاما كەلدى. مۇگەدەكتىگىم ءۇشىن نەبارى 33 000 تەڭگە عانا الامىن. ونىڭ ءوزى جالدامالى پاتەرىمنەن اسپايدى. نە ازىق-تۇلىك بەرەتىن قوسىمشا كومەكتەردە دە كورسەتىلمەيدى.
اسىراۋشىسىنان ايىرىلعان توگۋزباەۆا ەلۆيرا ەركەباەۆنا:
جەلتوقسان ايىندا بجت تولەگەن بولاتىنمىن. تج كەزىندە دە بجت تولەدىم. 7 ءساۋىر كۇنى 42500.enbek.kz سايتىنا ءوتىنىم بەردىم. 21 ءساۋىر كۇنى "بجت تولەمەگەنسىز" دەگەن باس تارتۋ حاتى كەلدى. بالامنىڭ اكەسى بولماعاندىقتان 26800 تەڭگە ۇكىمەتتەن كومەك الامىن. سوندا مەن 26 800 تەڭگەمەن قالاي كۇن كورەمىن؟ ول مەنىڭ قاي جىرتىعىمدى جامايدى؟ تۋرا مەنىڭ جاعدايىمداعى 2 بالاسى بار كەلىنشەككە دە باستارتۋ حابارلاماسى كەلدى. بۇل نەدەگەن سۇمدىق؟ تج-نىڭ اسىراۋشىسىنان ايىرىلعاندارعا قاتىسى جوق پا؟ بالالارىمىز تاماق جەمەي مە؟ سوڭعى تيىنىما جارىق پەن گازدىڭ اقشاسىن تولەدىم. ەندى قۋ باسىمدى قايدا سوعارىمدى بىلمەيمىن...
زەينەتكەر بالكەنجە نۇرجانوۆا:
"ەڭ تومەنگى زەينەتاقى الاتىندارعا 42500 تاعايىندالادى" دەگەن ەدى. بىراق ماعان "زەينەركەرسىز" دەگەن ءوتىنىمدى باستارتۋ حابارلاماسى كەلدى. 23 000 زەينەتاقىم نەگە جەتەدى؟
جالعىزباستى انا ماماسەيتوۆا رايا بەكمۋراتوۆنا:
ماعان «42500 تەڭگە بەرۋدەن باستارتىلدى» دەگەن حابارلاما كەلدى. جالعىزباستى انالارعا مەملەكەتتىڭ كومەك كورسەتپەيتىنىنە قايرانمىن. جۇمىس ىستەپ، تولىققانداي جالاقى الىپ وتىرعاندارعا دا 42500 تەڭگە ءتۇسىپ جاتىر. مەنىمەن بىردەي اسىراۋشىسى جوققا دا اقشا اۋدارىلۋدا. ۇكىمەت نەگە بارىنە بىردەي قارامايدى؟
جك-سى جابىلسا دا 42500 الا الماعان گۇلميرا مامەتوۆا:
42500 تەڭگەنى ماعان دا بەرمەدى. 5 جىل بۇرىن جابىلعان جەكە كاسىپكەرلىگىمدى سىلتاۋ ەتىپ تۇر. ايتارعا ءسوزىم جوق. ياندەكس تاكسيدە تاكسي جۇرگىزۋشىسى بولىپ جۇمىس ىستەپ، ناپاقامدى تاۋىپ ءجۇر ەدىم. تج ەنگىزىلگەننەن بەرى اقشاسىز قالدىم. ارى قاراي قالاي ءومىر سۇرەتىنىمدى بىلمەيمىن...
شايفولدا دامەش:
مەنىڭ جولداسىم قايتىس بولعان، جالعىز بالام ارمياعا كەتكەن. ۇكىمەتتەن ەشبىر كومەك المايمىن. سوندىقتان 42500 تەڭگەگە ءوتىنىم جىبەردىم. «12 ايدىڭ ىشىندە بجت تولەنگەن بولۋى كەرەك» دەگەن حات كەلدى. الايدا مەن كاسپي گولدتى سول ءۇشىن اشىپ، بجت تولەگەن ەدىم. قايتا-قايتا ءوتىنىم تاستاسام دا سولاي دەپ تۇر. جالعىزباستى انالارعا ۇكىمەت نەگە كومەك بەرمەيدى وسى؟
سالتانات جالعاس:
كۇيەۋىم ەگەن سۇلتانحان قۇرىلىستا جۇمىس جاسايتىن ەدى. تج ەنگىزىلگەننەن بەرى جۇمىسى مۇلدەم توقتاپ قالدى. سودان ءوتىنىش تاستاپ كوردىك. 11 ساۋىردە «42 500 تەڭگە تۇسەدى، ءوتىنىمىڭىز قۇپتالدى» دەگەن حابارلاما كەلگەن بولاتىن. الايدا سودان بەرى تۇپ-تۋرا 14 كۇن ءوتتى، اقشا ءالى تۇسپەدى. ءمان-جايدى انىقتاۋ ماقساتىندا 1414-كە قوڭىراۋ شالىپ ەدىم، جارتى ساعاتتان كەيىن تەلەفوندى الىپ، «بانككە حابارلاسىڭىز» دەدى. بانك «بىزگە اقشا اۋدارىلمادى، اۋدارىلسا جىبەرەتىن ەدىك» دەيدى. سودان 1414-كە تاعى حابارلاستىم. «1411-مەن بايلانىسىڭىز» دەپ سىلتەدى. ال ول ءنومىر ىستەمەيدى، «قاتە تەردىڭىز» دەپ تۇر.
اقگۇل ايداربەكوۆا،
"ادىرنا" ۇلتتىق پورتالى
