Eńbek jáne halyqty áleýmettik qorǵaý mınıstriniń nazaryna!
Amerıka tótenshe jaǵdaı kezinde ár adam basyna aı saıyn 600 dollarmen (258 600 teńge) kómek kórsetse, Qytaı tabysynan aıyrylǵandardyń 100% jalaqysyn tólep otyrady eken. Jańa Zelandııanyń úkimeti karantınde otyrǵan azamattaryna 585 Jańa Zelandııalyq dollardy (151 585 teńge) taǵaıyndasa, Danııada memleket jumysynan aıyrylǵandardyń 90% jalaqysyn óteıtin kórinedi.
Al bizde 30 sáýirden bastap 42500 teńge ekinshi ret berilmek. «Naǵyz qarajattan qysylǵan azamattar memlekettik kómekten qur qalyp, bir basynda birneshe jumysy barlar, bylaısha aıtqanda «aýzynan maıy aǵyp otyrǵandar» 42500 teńgeni taǵy almaq» deıdi TJ kezinde tabysynan aıyrylǵan Qazaqstan azamattary. Bunyń sebebi nede? Úkimettiń júıesiniń qateligi me? Álde buqaranyń saýatsyzdyǵy ma? Kópshiliktiń áleýmettik kómekten qaǵylý sebepteri qandaı? Osy máselelerdi anyqtap kórý maqsatynda 42500 teńgege naǵyz muqtaj jandardan «Adyrna» ulttyq portaly suhbat alǵan edi. Atalǵan máseleni eńbek mınıstri Birjan Nurymbetov nazarǵa alady degen senimdemiz.
3-toptaǵy múgedek Nurjan Sydyqov:
Men memlekettik kómek alý úshin BJT tóledim. 3-toptaǵy múgedek bolǵandyqtan 42 500 teńge alatynyma senimdi edim. Alaıda maǵan «Memleketten múgedektigińiz úshin qarajat alatyndyqtan ótinimińiz bastartyldy» degen habarlama keldi. Múgedektigim úshin nebári 33 000 teńge ǵana alamyn. Onyń ózi jaldamaly páterimnen aspaıdy. Ne azyq-túlik beretin qosymsha kómekterde de kórsetilmeıdi.
Asyraýshysynan aıyrylǵan Togýzbaeva Elvıra Erkebaevna:
Jeltoqsan aıynda BJT tólegen bolatynmyn. TJ kezinde de BJT tóledim. 7 sáýir kúni 42500.enbek.kz saıtyna ótinim berdim. 21 sáýir kúni "BJT tólemegensiz" degen bas tartý haty keldi. Balamnyń ákesi bolmaǵandyqtan 26800 teńge úkimetten kómek alamyn. Sonda men 26 800 teńgemen qalaı kún kóremin? Ol meniń qaı jyrtyǵymdy jamaıdy? Týra meniń jaǵdaıymdaǵy 2 balasy bar kelinshekke de bastartý habarlamasy keldi. Bul nedegen sumdyq? TJ-nyń asyraýshysynan aıyrylǵandarǵa qatysy joq pa? Balalarymyz tamaq jemeı me? Sońǵy tıynyma jaryq pen gazdyń aqshasyn tóledim. Endi qý basymdy qaıda soǵarymdy bilmeımin...
Zeınetker Balkenje Nurjanova:
"Eń tómengi zeınetaqy alatyndarǵa 42500 taǵaıyndalady" degen edi. Biraq maǵan "zeınerkersiz" degen ótinimdi bastartý habarlamasy keldi. 23 000 zeınetaqym nege jetedi?
Jalǵyzbasty ana Mamaseıtova Raıa Bekmýratovna:
Maǵan «42500 teńge berýden bastartyldy» degen habarlama keldi. Jalǵyzbasty analarǵa memlekettiń kómek kórsetpeıtinine qaıranmyn. Jumys istep, tolyqqandaı jalaqy alyp otyrǵandarǵa da 42500 teńge túsip jatyr. Menimen birdeı asyraýshysy joqqa da aqsha aýdarylýda. Úkimet nege bárine birdeı qaramaıdy?
JK-sy jabylsa da 42500 ala almaǵan Gúlmıra Mametova:
42500 teńgeni maǵan da bermedi. 5 jyl buryn jabylǵan jeke kásipkerligimdi syltaý etip tur. Aıtarǵa sózim joq. Iandeks taksıde taksı júrgizýshisi bolyp jumys istep, nápáqamdy taýyp júr edim. TJ engizilgennen beri aqshasyz qaldym. Ary qaraı qalaı ómir súretinimdi bilmeımin...
Shaıfolda Damesh:
Meniń joldasym qaıtys bolǵan, jalǵyz balam armııaǵa ketken. Úkimetten eshbir kómek almaımyn. Sondyqtan 42500 teńgege ótinim jiberdim. «12 aıdyń ishinde BJT tólengen bolýy kerek» degen hat keldi. Alaıda men Kaspıı Goldty sol úshin ashyp, BJT tólegen edim. Qaıta-qaıta ótinim tastasam da solaı dep tur. Jalǵyzbasty analarǵa úkimet nege kómek bermeıdi osy?
Saltanat Jalǵas:
Kúıeýim Egen Sultanhan qurylysta jumys jasaıtyn edi. TJ engizilgennen beri jumysy múldem toqtap qaldy. Sodan ótinish tastap kórdik. 11 sáýirde «42 500 teńge túsedi, ótinimińiz quptaldy» degen habarlama kelgen bolatyn. Alaıda sodan beri tup-týra 14 kún ótti, aqsha áli túspedi. Mán-jaıdy anyqtaý maqsatynda 1414-ke qońyraý shalyp edim, jarty saǵattan keıin telefondy alyp, «bankke habarlasyńyz» dedi. Bank «bizge aqsha aýdarylmady, aýdarylsa jiberetin edik» deıdi. Sodan 1414-ke taǵy habarlastym. «1411-men baılanysyńyz» dep siltedi. Al ol nómir istemeıdi, «qate terdińiz» dep tur.
Aqgúl AIDARBEKOVA,
"Adyrna" ulttyq portaly
