ەڭ الدىمەن، سوڭعى كۇندەرى بالالارىنان ايرىلىپ قالعان اتا-انالارعا كوڭىل ايتامىن. ەشكىمنىڭ باسىنا سالماسىن مۇنداي قايعىنى. «ەكىنشىدەن، بۇل جامان ىندەتتىڭ ارتىندا نە تۇر؟» دەگەن سۇراققا سىزدەرمەن بىرگە جاۋاپ ىزدەگەنىمىز دۇرىس شىعار دەپ ويلايمىن. ءبىزدىڭ قوعام بارلىق بولىپ جاتقان ماسەلەگە كىنالىنى سىرتتان ىزدەيدى: مەكتەپ، دوستارى، ينتەرنەت، ت.ب.
ءيا، كەلىسەمىن، ولاردىڭ دا اسەرى بار. بۇگىن الەۋمەتتىك جەلى بارلىق سۇراققا جاۋاپ بەرە الاتىن كەڭەسشىگە اينالدى. بىراق ونىڭ ىشىندە ارنايى ارانداتۋشى، وتىرىك اقپارات تاراتۋشى، تەرىس نارسەنى ناسيحاتتاۋشىلار دا وتىر. باسقانى قويعاندا بۇگىن ءوزىن كوۋچ دەپ اتاپ، ءبىزدىڭ ۇلتتىق قۇندىلىقتارىمىزعا قايشى اقپارات تاراتىپ وتىرعان ءوز ازاماتتارىمىز دا از ەمەس. سولاردىڭ ءبىرشاماسى – ءبىلىمسىز، ءتىپتى ماماندىعى جوق ادامدار. ال، ءبىزدىڭ قوعام سولاردىڭ «وڭ قولىڭىزعا قىزىل ءجىپ بايلاڭىز، ونى مەنەن ساتىپ الىڭىز، سوندا بارلىق ماسەلەڭىز شەشىلەدى» دەگەنىنە سەنەدى. وندا نەگە بالالار سەنبەۋى كەرەك؟ ولار سىزدەردەن كورگەنىن ىستەيدى عوي. ولار دا سول الەۋمەتتىك جەلىلەردەگى جالعان «دوسقا»، اقپاراتقا، جارناماعا سەنەدى. وتباسىنداعى اۋىزبىرشىلىك، بالامەن دوستىق قارىم-قاتىناس، ءوزارا سەنىم عانا بالا مەن اتا-انانىڭ اراسىندا تۇسىنىستىكتى قالىپتاستىرادى. بالا ءوز ومىرىندە بولىپ جاتقان قۋانىشپەن دە، قيىنشىلىقپەن دە، ەڭ الدىمەن، ءوز وتباسىمەن، ءوز وتباسىنىڭ مۇشەسىمەن بولىسە الۋ كەرەك قوي.
بۇگىندە بالالار پسيحيكالىق تۇرعىدان نازىك ەكەنىن مويىنداۋىمىز كەرەك. اقپاراتتىڭ تىم كوپتىگىنەن، ولارعا اينالاداعى كوپ اقپاراتتىڭ اق-قاراسىن اجىراتا الۋ قيىن. سول كەزدە بالالار جانىنا جاقىن ادام ىزدەيدى.
ال ءبىز بالامىزعا جاقىنبىز با؟! بۇل سۇراققا اركىم ءوز-وزىنە جاۋاپ بەرىپ كورسە دۇرىس بولار ەدى. ماتەريالدىق قامتاماسىز ەتۋ عانا بالانى باقىتتى ەتە الا ما؟! نەگە ءبىزدىڭ بالالارىمىز ءبىر-بىرىنە زورلىق (بۋللينگ) كورسەتەدى؟! قويا بەرسەك سۇراق كوپ.
«وسى ماسەلەلەردىڭ تۋىنداۋىندا مەنىڭ ءرولىم قانداي؟» دەگەن دە سۇراققا جاۋاپ ىزدەپ كورەيىك. كىنا الەۋمەتتىك جەلىدە بولسا، بيلىك باسىنداعىلار كەيبىر الەۋمەتتىك جەلىلەردى جاۋىپ تاستاسىن. بۇل باسقا مەملەكەتتەردە بار تاجىريبە. ەگەر اتا-انانىڭ بالالارعا ۋاقىت بولۋىنە بايلانىستى بولسا، جۇمىس بەرۋشىلەر كونستيتۋتسياعا سايكەس جۇمىس ۋاقىتىن 8 ساعاتتان اسىرمايتىن ءتارتىپتى قاتاڭ ۇستانسىن. سودان كەيىنگى ۋاقىتتى وتباسىنا ارناۋ تۋرالى (مىسالى، نورۆەگيادا جۇمىستان كەيىن دەنساۋلىعىڭدى نىعايتۋعا جاۋاپتىسىڭ) قاعيدانى قوعامدا تۇراقتى ورناتۋ كەرەك.
انالار كەڭەسىنىڭ «كەشكى ءشاي» دەگەن جوباسى بار. ءار وتباسى كەشكى اسىن ءوز وتباسىندا، بالا-شاعاسىمەن ءىشۋ كەرەك. اتا-انادان باستاپ وتباسىنىڭ ءار مۇشەسى ءبىر كۇندە باسىنان وتكەنىمەن شىنايى ءبولىسۋدى داستۇرگە اينالدىرۋ كەرەك. سوندا بالاڭىزدىڭ دوسى كىم، ارمانى قانداي، قانداي ويىن قىزىقتىرادى جانە ت.ب ءبىلىپ وتىرۋعا بولادى.
ال كەزدەسۋلەر، تويلار، باسقا دا باس قوسۋلار ءسىزدىڭ بالالارىڭىزدىڭ ومىرىنەن، ءسىزدىڭ وتباسىڭىزدىڭ باقىتىنان ارتىق ەمەس.
ويلانايىق، اعايىن!
نازيپا ىدىرىسقىزى شاناي
قحا انالار كەڭەسىنىڭ توراعاسى
