اقتوبە وبلىسى تەمىر اۋدانى قايىڭدى اۋىلدىق وكرۋگى اكىمدىگى "قايىڭدىداعى ساياباقتى سۋارۋ جانە كۇتىپ ۇستاۋ قىزمەتى" دەگەن تاقىرىپپەن تەندەر جاريالاپ، بيۋدجەتتەن 2 232 143 تەڭگە قارجى ءبولدى، دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
مەملەكەتتىك ساتىپ الۋ تۋرالى حابارلاما 13 قىركۇيەك كۇنى جاريالانعان. تەندەر جەڭىمپازى 20 قىركۇيەك كۇنى انىقتالادى. تەحنيكالىق سيپاتتامادا مەملەكەتتىك ساتىپ الۋدى جۇزەگە اسىرۋشى كومپانيا ساياباقتاعى اعاش كوشەتتەرىنە تامشىلاتىپ سۋارۋ جۇيەسىن ورناتۋى كەرەكتىگى جازىلعان. تاپسىرىس بەرۋشى تاراپ تامشىلاتىپ سۋارۋدىڭ ارتىقشىلىقتارىنا دا توقتالىپ، ساياباقتاعى كوشەتتەر بىركەلكى سۋ ىشەتىنىن، كۇنگە كۇيىپ، توپىراعى كەرىش بولىپ قاتىپ قالمايتىنىن، ت.ب ماسەلەلەردى ءتىزىپ شىعىپتى. وتىرعىزىلعان كوشەتتەردى سۋارۋ تاپسىرىس بەرۋشىنىڭ جاۋاپتى مامانىنىڭ قاتاڭ باقىلاۋىمەن جۇزەگە اساتىنىن دا ەسكەرتكەن. تاپسىرىستى ورىنداۋشى كومپانيا بەكىتىلگەن كەستە بويىنشا ارنايى ىدىستاردى سۋعا تولتىرۋ ارقىلى اپتاسىنا 3 رەت ساياباقتى سۋارىپ تۇرۋعا مىندەتتى. سونداي-اق تەحنيكالىق سيپاتتامادا قۇرىلىس جۇمىستارىنىڭ بارلىق ءتۇرى، سونىڭ ىشىندە قورشاۋلار مەن سۋارۋ جۇيەلەرىنە ارنالعان شىعىس ماتەريالدارى جەتكىزۋشىنىڭ ەسەبىنەن جۇزەگە اسىرىلاتىنى، سىيىمدىلىعى كەمىندە 10 م3 سۋ تاسىعىش بولۋى قاجەتتىگى، جۇمىستى كەمى 2 ادام جۇرگىزۋى كەرەكتىگى كورسەتىلگەن.
2024 جىلدىڭ اياقتالۋىنا بار بولعانى 3 اي ۋاقىت قالدى. سوندا قايىڭدى اۋىلدىق وكرۋگى اكىمدىگى ساياباققا جاڭادان ەگىلگەن كوشەتتەردى قاقاعان سۋىقتا سۋارماق پا؟ ساياباقتى سۋارۋعا كوكتەمدە، يا جازدا 2 232 143 تەڭگە ءبولىنىپ جاتسا، تۇسىنۋگە بولار. قىركۇيەكتىڭ اياعىندا ساياباقتى سۋعارۋعا قازىنا قارجىسىنان اقشا ءبولۋ اقىلعا سيا ما؟
بۇل سۇراقتاردى ءتيىستى مەكەمەگە جولدادىق. ولاردان جەتكەن جاۋاپتى الداعى ۋاقىتتا جاريالايتىن بولامىز.
اباي اسىل
“ادىرنا” ۇلتتىق پورتالى
