سەمەيدى دامىتۋ باعدارلاماسى اياسىندا 2025 جىلعا دەيىن 56 جوبا جۇزەگە اسىرىلادى

2574
Adyrna.kz Telegram

ورتالىق كوممۋنيكاتسيالار قىزمەتىندە وتكەن بريفينگ بارىسىندا شقو اكىمى دانيال احمەتوۆ مەملەكەت باسشىسى قاسىم-جومارت توقاەۆ پەن ەل ۇكىمەتى سەمەي قالاسىن دامىتۋعا ۇلكەن قولداۋ كورسەتىپ وتىرعانىن اتاپ ءوتتى.

ەستەرىڭىزگە سالا كەتەيىك، قازان ايىندا پرەمەر مينيستر قالا حالقىمەن كەزدەسۋ وتكىزىپ، سەمەيدىڭ 2020-2025 جىلدارعا ارنالعان كەشەندى دامۋ باعدارلاماسىنىڭ تانىستىرىلىمىنا قاتىسقان بولاتىن. جوسپارعا سايكەس جەتى باعىت بويىنشا 56 جوبا جۇزەگە اسىرىلادى. وعان 250 ملرد. تەڭگە قاراستىرىلعان.

ايتا كەتەيىك، سوڭعى ءۇش جىلدىڭ ىشىندە قالانى اباتتاندىرۋ جۇمىستارىنا، سونداي-اق جولداردى جوندەۋگە 13,5 ملرد.تەڭگە جۇمسالدى. ال مەكتەپتەردى جوندەۋ جۇمىستارىنا 1,5 ملرد.تەڭگە ءبولىندى. ۇشاقتار كەنتىندە 1200 ورىندىق، بوبروۆكادا 600 ورىندىق مەكتەپ قولدانىسقا بەرىلدى. قاراعايلى جاڭا ىقشام اۋدانىندا 20 كوپقاباتتى تۇرعىن ءۇي سالىندى. قازىرگى كۇنى جەكە تۇرعىن ءۇي قۇرىلىستارىن جۇرگىزۋ ءۇشىن الاڭدارداعى ينفراقۇرىلىم جاقسارتىلۋدا. اۆتوبۋس پاركىنىڭ 80% جاڭارتىلدى. جەرگىلىكتى ءوندىرۋشى كومپانيا "Daewoo Bus Kazakhstan” جشس-ءنىڭ 267 اۆتوبۋسى قالا ىشىندەگى مارشرۋتتاردا قىزمەت كورسەتۋدە. اۋەجايدا قايتا جاراقتاندىرۋ جۇمىستارى جۇرگىزىلدى. حالىقارالىق دەڭگەيدەگى "اباي-ارەنا" كوپ فۋنكتسيالى سپورت كەشەنىنىڭ قۇرىلىسى اياقتالۋعا جاقىن.

كەشەندى جوسپار اياسىندا سەمەيدە ءتورت مىڭنان استام جۇمىس ورنى اشىلىپ، 133 كوپقاباتتى تۇرعىن ءۇي قولدانىسقا بەرىلەدى. الەۋمەتتىك سالانى دامىتۋ ماقساتىندا 47 ملرد.تەڭگە ءبولىنىپ، 4 مەكتەپ، 4 بالاباقشا، مۇز ايدىنى ءمودۋلى، بالالار اۋرۋحاناسى، مۇمكىندىگى شەكتەۋلى جاندارعا ارنالعان وڭالتۋ ورتالىعى بوي كوتەرەدى. سونداي-اق مەملەكەتتىك جەكەمەنشىك سەرىكتەستىك اياسىندا بيۋدجەتتەن تىس 76 ملرد.تەڭگە تارتۋ قاراستىرىلعان.

- ونەركاسىپ ءوندىرىسىنىڭ كولەمى 5 جىلدىڭ ىشىندە 1,6 ەسەگە ارتادى. اۋىل شارۋاشىلىعى ءونىمى 1,2 ەسەگە، بولشەك ساۋدا تاۋار اينالىمى 2 ەسەگە ارتادى. سونىمەن قاتار 1-6 جاس ارالىعىنداعى بۇلدىرشىندەر مەكتەپكە دەيىنگى ءبىلىم بەرۋ مەكەمەلەرىمەن 100 پايىز قامتىلادى، - دەدى دانيال احمەتوۆ.

پىكىرلەر