تەمىرالىدەي تالانتتىڭ تاسادا قالعانى قالاي؟

2289
Adyrna.kz Telegram

«بارىپ قايت، بالام، اۋىلعا» سىندى جۇرەك تەربەر تاماشا اندەرىمەن حالقىنىڭ جانىن تەربەتكەن قازاقتىڭ تالانتتى كومپوزيتورى الپىستى القىمداعان تەمىرالى باقتىگەرەەۆ تىلدەي عانا حاتتا ءوزىنىڭ جان سىرىن اقتارىپ، ەل ىشىندە جۇرسە دە، ەلەۋسىز عۇمىر كەشىپ جاتقانىنا نالىپ، مۇڭىن شاعىپتى.

تاعدىرىمەن بەتپە-بەت قالعان ونەرپاز اعامىزدىڭ حاتىن قىزى ءاليا قاعازعا ءتۇ­سىرىپ جولداعان ەكەن. وقىرمان قاۋىم نازا­رىنا حاتتىڭ تولىق تۇپنۇسقاسىن ۇسىنىپ وتىرمىز:

«وسى حاتتى جازىپ وتىرعان كومپوزيتور، جۋرناليست، ءى توپتىڭ مۇگەدەگى تەمىرالى باق­تىگەرەەۆ اعاڭىز. 1989 جىلدان بەحتەرەۆ دەگەن اۋرۋمەن ءى توپتىڭ مۇگەدەگى بولعانىم ازداي، 2002 جىلدىڭ قاراشا ايىندا كولدەنەڭ كەلگەن قاسىرەت – كوشەدە قاسيەتسىز بىرەۋدىڭ اۆتوكولىگى سوققاننان ءولىم اۋزىنان قالىپ، قازىرگى ۋاقىتتا ءجۇرىپ-تۇرۋ دا قيىن، جەڭگەڭنىڭ جەتەلەگەن كومە­گى­مەن كۇن كورۋدەمىن.

مەنىڭ شىعارماشىلىعىم حالىقتىڭ جۇرەگىندە دەپ بىلەمىن. 250-گە تارتا اندەر شىعاردىم، ولاردىڭ كوبىسى حالىققا تارالىپ كەتتى. اسىرەسە «بارىپ قايت، بالام، اۋىل­عا»، «عاشىقتار سەنىمى»، «تاڭعى تىلەك»، «سا­عىنىش»، «كەشىر مەنى»، «ءمادينا»، «قا­­زاق ەلىم»، «ەر ماحامبەت» ت.ب. كەڭ تارا­عان اندەرىمدى وزىڭىزگە اتاق-داڭقتارى وتە تا­نىس كومپوزيتور ە.حاسانعاليەۆ، ن.ۇسەم­باە­ۆا، ت.جامانقۇلوۆ، ع.ەسيموۆ، ن.ونەر­با­ەۆ پەن «مۋزارت» توبى، س.جۇماعاليەۆ، گ.سيقىمباەۆا، ل.تولەشەۆا، ر.مۇساباەۆ، ج.قۇ­جىمانوۆ، س.نۇربەرگەنوۆ سياقتى ماي­تالماندار ورىنداۋدا.

«بارىپ قايت، بالام، اۋىلعا» اتتى ءانىم بۇكىل دۇنيەجۇزى قازاقتارىنا تانىلدى. ايگىلى تاەكۆوندو شەبەرى مۇستافا ءوز تۇرىك وسى ءان بويىنشا جەكە فيلم ءتۇسىرىپ، وزىنە بويتۇمار ەتتى.

الپىستان اسقان شاعىمدا نە اتاق، نە ءبىر ارنايى سىيلىقپەن ماراپاتتالماپپىن. شىعارماشىلىق سوڭىنا تۇسكەن قىرىق جىلدىڭ ىشىندە ەشقانداي شاھاردا جەكە ءۇي-جايىم بولماپتى».

شىنىندا دا، ونەردى ورگە سۇيرەتىپ، ءاندى باعالايتىن قازاق قوعامى بۇگىندە تەمىرالىدەي تالانتىن ۇمىت قالدىرعانى قالاي؟ قاراپ وتىرساق، سوڭعى 10-15 جىل بەدەرىندە تەمىرالى اعامىز نە ءبىر ۇلكەن كونتسەرتتەرگە، نە ءبىر مەرەيتويلار مەن ءسان-سالتاناتى كەلىسكەن كەشتەرگە شاقىرىل­ماپتى. قازاعىن ءان-كەۋدەسىمەن قۇشۋعا قۇ­مارتىپ-اق تۇراتىن تالانتتى كومپوزيتورى­مىز­عا نە ءبىر اتاق-دارەجە، نە ءبىر ماراپات قاعاز دا بۇيىرماپتى. دەن­ساۋ­لىعىنىڭ اۋىرلىعى­مەن قوسا باسپانا زارىن دا كو­رىپ كەلەدى. كەيىنگى كەزدە ءتىپتى جۇرۋدەن دە قالىپ، سويلەۋى دە قيىن بولىپ كەتىپتى. وسىنشاما بەلگىلى ادامنىڭ لايىق­تى دارەجەدە باعالانباۋى­نىڭ استارىنا ۇڭىلگىمىز كەلىپ، ءبىز ءبىراز جەرلەرگە تەلەفون شالىپ، حابارلاستىق.

جارىلقاسىن داۋلەت، كومپوزيتور:

– تەمىرالى اعامىزدىڭ تالانتتى كومپوزيتور ەكەنىنە داۋ جوق. ول كىسىنىڭ ءبىر عانا «بارىپ قايت، بالام، اۋىلعا» دەگەن ءانىنىڭ ءوزى نەگە تۇرادى؟ بىراق، وكىنىشكە وراي، ءبىز وسىنداي دارىندى ادامداردى دەر كەزىندە باعالاي الماي جاتامىز. تەمىرالى اعامىزدىڭ بار­لىق ماراپات پەن سىيلىقتاردان قاعىلىپ قالا بەرۋى، مۇلدە ەسكەرۋسىز قالۋى كومپوزيتورلار وداعىنا مۇشە ەمەستىگىنەن بولۋى كەرەك. بىزدە كومپوزيتور رەتىندە رەسمي مويىندالۋ ءۇشىن ارنايى ديپلومىڭ بولۋى شارت. وسىنداي قاتىپ قالعان تالاپتار قانشاما جاي­ساڭدارىمىزدىڭ باعىن بايلاپ وتىر. ديپ­لومنان بۇرىن ادامنىڭ تالانتى تارا­زىعا ءتۇسۋ كەرەك ەمەس پە؟ تەمىرا­لىدەي اعا­لا­رىمىزدىڭ ەلەۋسىز قالعانىنا مەنىڭ دە جا­نىم اۋىرادى. ونەر سالاسىندا جۇرگەن جان­دار مۇنداي جاعدايعا بەيجاي قارا­ماۋ­عا ءتيىس دەپ ويلايمىن.

بۇدان سوڭ كومپوزيتورلار وداعىنىڭ ءتورا­يىمى بالنۇر قىدىربەك اپايىمىزعا تەلەفون شالدىق:

– اللو، سالەمەتسىز بە، تەمىرالى باق­تىگەرەەۆ دەگەن كومپوزيتور اعامىز بار عوي، بىلەسىز…

– ونداي كومپوزيتور جوق «ۆووبششە»، تەك اۋەسقوي ءبىر ادام بولعان…

– ەندى، قالاي بولعاندا دا ول كىسى ەل بىلەتىن ادام عوي… سول اعامىزدىڭ دەن­ساۋلىعى دا اۋىر حالدە. وسى ۋاقىتقا دەيىن باعالانبادىم دەپ حات جولداپتى… سوندا بۇل كىسى كومپوزيتورلار ودا­عىنىڭ مۇشەسى ەمەس پە؟

– جوق، مۇشەسى ەمەس.

– اعامىزدىڭ وسىنداي ءحالىن ەسكەرىپ، قابىلداۋعا بولماي ما؟

– بولمايدى!

– سوندا اعامىز ەلەۋسىز-ەسكەرۋسىز قالا بەرمەك پە؟

– كەزىندە وقىپ، ءبىلىم الماعان ءوز وبا­لى وزىنە. ەندى ءبىز قايتەمىز؟ ءبىزدىڭ جارعىمىز بويىنشا سولاي! ول ءۇشىن ارنايى مۋزىكا­لىق، كونسەرۆاتوريالىق ءبىلىم كەرەك. ول كى­سىدە ونداي جوق. دۇنيەدە ءاۋ دەمەيتىن قازاق جوق. ەلدىڭ ءبارى ءان شىعارادى. ەندى ونىڭ ءبارىن وداققا مەن قالاي قابىل­داي­مىن؟

– جارايدى، راقمەت، تۇسىنىكتى بولدى.

ءاليا باقتىگەرەەۆا، كومپوزيتوردىڭ قىزى:

– اكەمىز بۇرىن كومپوزيتورلار وداعى­نىڭ مۇشەسى بولعان. بىراق كەيىن بەلگىسىز ءبىر سەبەپتەرمەن شىعارىلعان. ەڭ قيىنى – اكە­مىزدى بۇرىن ارالاسقان بىردە-ءبىر ءارىپ­تەسى ىزدەمەيتىن بولدى. ءوزى توسەك تارتىپ قال­دى. ءتىلى كۇرمەلىپ سويلەي دە المايدى. كەي­­بىرەۋلەر ءتىپتى «تەمىرالى باقتىگەرەەۆ قاي­تىس بوپ كەتكەن» دەپ ويلايدى ەكەن… قا­زىر ءبىر­قاتار تانىمال كومپوزيتور اعالا­رى­مىزعا ءوتى­نىشپەن شىعىپ جاتىرمىن. ءنا­تيجەسى قان­داي بولارىن بىلمەيمىن. اكەمنىڭ مۋزى­كا­لىق ءبىلىمى دە بار. اندەرى ەفيرلەردەن شىر­قالعان سايىن كوڭىلىمىز تولقىپ وتى­رادى.

قازىرگىدەي اقپاراتتار تاسقىنى مول زاماننىڭ جەتىستىكتەرىنە سۇيەنىپ، بۇل كىسى تۋرالى وزگە دە تىڭ مالىمەتتەر تاۋىپ قالامىز با دەپ عالامتور ارقىلى «google» سايتىندا دا ىزدەۋ سالىپ كورگەنىمىزدە تەك جالعىز عانا قىسقا مالىمەتكە تاپ بولدىق. وندا تەك «تەمىرالى باقتىگەرەەۆ باتىس قازاقستان وبلىسى كازتالوۆ اۋدانى بەرەزين اۋىلىندا تۋعان. الماتى مۋزىكالىق ۋچيليششەسىن، قازۇۋ-دىڭ جۋرناليستيكاسىن بىتىرگەن» دەپ قانا جازىلعان. ال باسقا كومپوزيتورلار تۋرالى، اسىرەسە جاس ءانشى-سازگەرلەر جايىندا ينتەرنەتتەن مىڭداعان مالىمەتتەر الدىڭنان قاپتاپ شىعا كەلەدى. قالاي دەسەك تە، توسەككە تاڭىلعان تاعى ءبىر تالانتىمىزدىڭ تاسادا قالىپ بارا جاتقانى وكىنىشتى-اق.


المات ءيسادىل

پىكىرلەر