الماتى قالاسىندا بالالارعا ارنالعان “SIM KID” اتتى SIM-كارتالاردى شىعارۋ بويىنشا پيلوتتىق جوبا ىسكە قوسىلدى. جوبا قازاقستاندىق بايلانىس وپەراتورىنىڭ قولداۋىمەن جۇزەگە اسۋدا، دەپ حابارلايدى «ادىرنا» ۇلتتىق پورتالى.
بۇل تۋرالى قر باس پروكۋرورى بەرىك اسىلوۆ الەۋمەتتىك جەلىدە مالىمدەدى.
“بۇل – ءسۋيتسيدتى ناسيحاتتاۋ، پورنوگرافيا، ەسىرتكى، ونلاين-كازينو جانە باسقا دا ينتەرنەت قاۋىپتەردەن قورعايتىن ارنايى بالالارعا ارنالعان SIM-كارتا. اتا-انالار بۇل ارقىلى بالانىڭ قانداي قوسىمشالاردى پايدالاناتىنىن كورە الادى، قاۋىپتى سايتتارعا كىرۋىن شەكتەي الادى جانە ءتىپتى تەلەفون ءۇنسىز رەجيمدە بولسا دا، بالاسىنا قوڭىراۋ شالا الادى”، – دەپ جازدى اسىلوۆ.
تەستىلىك كەزەڭ اياقتالعاننان كەيىن، بۇل SIM-كارتالار ەلىمىز بويىنشا قولجەتىمدى بولماق.
بۇعان دەيىن قر وقۋ-اعارتۋ مينيسترلىگى 2023–2025 جىلدارعا ارنالعان بالالاردى زورلىق-زومبىلىقتان قورعاۋ، ءسۋيتسيدتىڭ الدىن الۋ جانە ولاردىڭ قۇقىقتارى مەن ءال-اۋقاتىن قامتاماسىز ەتۋ جونىندەگى كەشەندى جوسپارعا تولىقتىرۋلار ەنگىزىلگەنىن حابارلاعان بولاتىن. اتاپ ايتقاندا، “بالالارعا ارنالعان SIM-كارتالاردى ەنگىزۋ، ولاردى بالانىڭ جسن-ى جانە تۋ تۋرالى كۋالىگىنىڭ ءنومىرى ارقىلى تىركەۋ” ۇسىنىلعان.
ايتا كەتەيىك، بۇل باستاما العاش رەت 2023 جىلى وقۋ-اعارتۋ ۆيتسە-ءمينيسترى ەدىل وسپاننىڭ تاراپىنان ۇسىنىلعان بولاتىن. جوبا اياسىندا اتا-انا SIM-كارتانى ءوز قۇرىلعىسىنا “بايلاپ”، بالاسىنىڭ ينتەرنەتتى قالاي پايدالانىپ جۇرگەنىن باقىلاي الادى.
ۇقساس جاڭالىقتار
