قازاقستاندا بالالارعا ارنالعان sim-كارتا پايدا بولدى. بۇل تۋرالى باس پروكۋراتۋرانىڭ ءباسپاسوز قىزمەتىمالىمدەدى، دەپ حابارلايدى "ادىرنا".
پروكۋراتۋرانىڭ مالىمەتىنشە، پيلوتتىق جوبا الماتى قالاسىندا قوسىلعان. SIM KIDS جوباسى كامەلەتكە تولماعان بالالاردى ينتەرنەتتەگى زياندى كونتەنتتەن قورعاۋدى كوزدەيدى.
SIM KIDS جوباسى باس پروكۋروردىڭ تاپسىرماسىمەن جۇزەگە اسىرىلعان. 2023-2025 جىلدارعا ارنالعان بالالاردى زورلىق-زومبىلىقتان قورعاۋ، ءسۋيتسيدتىڭ الدىن الۋ جانە ولاردىڭ قۇقىقتارى مەن ءال-اۋقاتىن قامتاماسىز ەتۋ جونىندەگى كەشەندى جوسپارعا كامەلەتكە تولماعانداردى ينتەرنەتتەگى دەسترۋكتيۆتى كونتەنتتىڭ زياندى اسەرىنەن قورعاۋعا باعىتتالعان ۇسىنىستار ازىرلەنگەن.
«وسى باستاما اياسىندا الماتى قالاسىنىڭ پروكۋراتۋراسى TELE2/ALTEL بايلانىس وپەراتورىمەن بىرلەسىپ «SIM KIDS» پيلوتتىق جوباسىن ىسكە قوستى. بۇل ينتەرنەتكە قاۋىپسىز جانە باقىلاناتىن قول جەتكىزۋدى قامتاماسىز ەتەتىن ارنايى بالالار SIM-كارتاسى»، – دەلىنگەن ءباسپاسوز حابارلاماسىندا.
پروكۋراتۋرانىڭ مالىمەتىنشە، بالالارعا ارنالعان sim-كارتا اۆتوماتتى تۇردە زياندى كونتەنتتى بۇعاتتاپ وتىرادى. كارتانىڭ ءبىر ەرەكشەلىگى بالانىڭ تەلەفونى دىبىسسىز رەجيمدە بولسا دا، اتا-انانىڭ بالامەن بايلانىس ورناتۋىنا مۇمكىندىك بەرەدى. سونداي-اق اتا-انالار بالانىڭ قوسىمشالارداعى بەلسەندىلىگىن باقىلاي الادى.
جوبا پيلوتتىق سىناقتان ءساتتى وتكەن. قازىرگى ۋاقىتتا sim-كارتانى كەز-كەلگەن ادام پايدالانا الادى.
