Almaty qalasynda balalarǧa arnalǧan “SIM KID” atty SIM-kartalardy şyǧaru boiynşa pilottyq joba ıske qosyldy. Joba qazaqstandyq bailanys operatorynyŋ qoldauymen jüzege asuda, dep habarlaidy «Adyrna» ūlttyq portaly.
Būl turaly QR Bas prokurory Berık Asylov äleumettık jelıde mälımdedı.
“Būl – suisidtı nasihattau, pornografiia, esırtkı, onlain-kazino jäne basqa da internet qauıpterden qorǧaityn arnaiy balalarǧa arnalǧan SIM-karta. Ata-analar būl arqyly balanyŋ qandai qosymşalardy paidalanatynyn köre alady, qauıptı saittarǧa kıruın şektei alady jäne tıptı telefon ünsız rejimde bolsa da, balasyna qoŋyrau şala alady”, – dep jazdy Asylov.
Testılık kezeŋ aiaqtalǧannan keiın, būl SIM-kartalar elımız boiynşa qoljetımdı bolmaq.
Būǧan deiın QR Oqu-aǧartu ministrlıgı 2023–2025 jyldarǧa arnalǧan balalardy zorlyq-zombylyqtan qorǧau, suisidtıŋ aldyn alu jäne olardyŋ qūqyqtary men äl-auqatyn qamtamasyz etu jönındegı keşendı josparǧa tolyqtyrular engızılgenın habarlaǧan bolatyn. Atap aitqanda, “balalarǧa arnalǧan SIM-kartalardy engızu, olardy balanyŋ JSN-y jäne tuu turaly kuälıgınıŋ nömırı arqyly tırkeu” ūsynylǧan.
Aita keteiık, būl bastama alǧaş ret 2023 jyly Oqu-aǧartu vise-ministrı Edıl Ospannyŋ tarapynan ūsynylǧan bolatyn. Joba aiasynda ata-ana SIM-kartany öz qūrylǧysyna “bailap”, balasynyŋ internettı qalai paidalanyp jürgenın baqylai alady.
Ūqsas jaŋalyqtar
