بۇگىن عانا قازاقستان رەسپۋبليكاسىنداعى بالا قۇقىقتارى جونىندەگى ۋاكىل لاۋازىمىنا تاعايىندالعان دينارا زاكيەۆا قىزمەتىنە كىرىسىپ ۇلگەردى. ول قىزمەت بابىندا قازا تاپقان ورمان شارۋاشىلىعى قىزمەتكەرلەرىنىڭ بالالارىمەن كەزدەسۋ ءۇشىن اباي وبلىسىنا بارادى، دەپ حابارلايدى “ادىرنا” ءتىلشىسى.
مەملەكەت باسشىسىنىڭ وكىمىمەن جاڭا قىزمەتكە تاعايىندالعان دينارا زاكيەۆا اباي وبلىسىنداعى الاپاتتان قايتىس بولعانداردىڭ جانە ەۆاكۋاتسيالاۋ پۋنكتتەرىندەگى بالالارمەن كەزدەسپەكشى. بۇل ويى تۋرالى جاڭا ۋاكىل Facebook-تاعى جەكە پاراقشاسىندا ءبولىستى:
«بۇگىن مەملەكەت باسشىسى مەنى قازاقستان رەسپۋبليكاسىنداعى بالا قۇقىقتارى جونىندەگى ۋاكىل قىزمەتىنە تاعايىنداپ، ەڭ ماڭىزدى سالادا جۇمىس ىستەۋدى تاپسىردى. قاسىم-جومارت كەمەلۇلىنىڭ مۇنداي سەنىمى مەن ءۇشىن ۇلكەن جاۋاپكەرشىلىك.
بۇل، ەڭ الدىمەن، بالالاردى قورعاۋ جانە وتباسىن قولداۋ سالاسىنداعى جاعدايدى جاقسارتۋعا مۇمكىندىك. مەن ەلىمىزدىڭ بالالارىنىڭ وتكىر ماسەلەلەرىن شەشۋدە جۇيەلى وزگەرىستەر ەنگىزۋگە بار كۇش-جىگەرىمدى سالامىن.
بۇگىن مەن اباي وبلىسىنا ورتتەن قازا تاپقان ورمان شارۋاشىلىعى قىزمەتكەرلەرىنىڭ بالالارىمەن، سونداي-اق ەۆاكۋاتسيالاۋ پۋنكتتەرىندەگى بالالارمەن كەزدەسۋگە بارامىن.
مەملەكەت باسشىسى ورتتەن زارداپ شەككەن وتباسىلارعا جاردەماقى تاعايىنداۋ، بالالاردى وقىتۋ بويىنشا ناقتى تاپسىرمالار بەردى. بالالىق شاق باقىتتى جانە قاۋىپسىز بولۋى كەرەك. بۇل مەنىڭ باستى ۇستانىمىم»، - دەپ جازدى.
سونداي-اق، دينارا زاكيەۆا ۇسىنىستار مەن كەز كەلگەن سۇراقتاردى قابىلداۋعا دايىن ەكەنىن جەتكىزدى. ءتىپتى، جازبادا ءوزىنىڭ جەكە WhatsApp ءنومىرىن قالدىرىپ، بارلىق حابارلاماعا جاۋاپ بەرەتىنىن اتاپ ءوتتى.
ۇقساس جاڭالىقتار
