بۇگىن - ۇلت ۇستازى احمەت بايتۇرسىنۇلى اتۋ جازاسىنا كەسىلگەن كۇن.
كسرو حالىق كوميسسارلار كەڭەسى جانىنداعى بىرىككەن مەملەكەتتىك ساياسي باسقارما (وگپۋ) القاسى «ۇشتىگىنىڭ» 1930جىلى 4 ساۋىردەگى شەشىمىنە سايكەس احمەت بايتۇرسىنۇلى باستاعان قىرىققا جۋىق ادام ءارتۇرلى مەرزىمدەرگە قامالۋعا، جەر اۋدارىلۋعا كەسىلدى.
بۇل شەشىم كەيىن بىرنەشە رەت وزگەرىستەرگە ۇشىرادى: 1931 جىلى قاڭتاردا احمەت بايتۇرسىنۇلى 10 جىلعا كونتسلاگەرگە اۋىستىرىلسا، 1932 جىلى قاراشادا 3 جىلعا ارحانگەلسكىگە جەر اۋدارىلسىن دەپ ۇيعارىلدى. ۇلت ۇستازىنا ورىس زيالىلارىنىڭ ءوزى اراشا تۇسەدى.
اتالعان ۇكىممەن ماعجان جۇماباەۆ، ەلدەس وماروۆ، يبراگيم ساتباەۆ، ءابۋالي ءادىلوۆ، اسقار ءادىلوۆ، ابدوللا ۇزاقبەكوۆ العاشىندا 10 جىلدىق مەرزىمگە كونتسلاگەرگە كەسىلىپ، بۇل ۇكىم كەيىن سولتۇستىك ولكەگە جەر اۋدارۋمەن الماستىرىلدى. ال كارىم جالەنوۆ، دارحان كەنجەباەۆ، تورەقۇل مۇراتوۆ، اقبار ىبىراەۆ، نۇرلان كارىباەۆ، العابەك بايدۋللاەۆ بەس جىل مەرزىمگە كونتسلاگەرگە جىبەرىلدى.
وسىلايشا بايتۇرسىنۇلى ايداۋ مەن قۋعىننىڭ اراسىندا ادام توزگىسىز جاعدايدا ءومىر سۇرسە دە، 1937 جىلعا دەيىن قازاق مۇددەسىنە قىزمەت ەتۋگە مۇمكىندىك الدى.
5 رەت سوتتالىپ، 2 رەت جەر اۋدارىلعان احمەت بايتۇرسىنۇلى 1937 جىلى 8 قازاندا سوڭعى رەت تۇتقىندالىپ، 8 جەلتوقساندا اتۋ جازاسىنا كەسىلدى. وعان «حالىق جاۋى» دەگەن ايىپ تاعىلعان بولاتىن. قوعام قايراتكەرىنىڭ جاقتاستارىن، تۋعان-تۋىستارىن قۋدالاۋ 1988 جىلعا دەيىن جالعاستى.
1988 جىلدان كەيىن قازاقستانداعى كوپتەگەن كوشە، مەكتەپتەرگە بايتۇرسىنۇلىنىڭ ەسىمى بەرىلدى. بۇگىنگى تاڭدا ءتىل ءبىلىمى ينستيتۋتى، قوستاناي وڭىرلىك ۋنيۆەرسيتەتى ۇلى تۇلعانىڭ ەسىمىمەن اتالادى.
