بۇگىن - ەكى بىردەي وليمپيادا چەمپيونى تۋعان كۇن. ءبىرى - سيدنەي وليمپياداسىنىڭ چەمپيونى، بوكسشى بەكزات ساتتارحانوۆ، ەكىنشىسى - سۋعا ءجۇزۋ سپورتىنان قازاقستان سپورت تاريحىندا تۇڭعىش التىن العان سپورتشى دميتري بالاندين.
بەكزات ساتتارحانوۆ 1980 جىلدىڭ 4 ساۋىرىندە تۇركىستان قالاسىندا دۇنيەگە كەلگەن. 20 جاسىندا وليمپ تۇعىرىن باعىندىرعان باتىر ءتىرى بولسا بۇگىن 45 جاسقا تولار ەدى.
كىشكەنتايىندا اتا-اناسى بەكزاتتى سپورت ۇيىرمەسىنە بەرۋدى ءجون ساناپ، كۇرەس ۇيىرمەسىنە جازدىرادى. الايدا بەكزات كۇرەستى قۇپ كورمەي، 1995 جىلدان باستاپ بىلعارى قولعاپقا قۇمارتقان.
بەكزاتتىڭ بوكستاعى عۇمىرى بار-جوعى بەس جىلعا سوزىلعان. كەيبىرەۋلەر ءۇشىن جىلدار بويى باعىنباي كەتكەن وليمپيادا بيىگى بەكزاتقا بەس جىلدىڭ ىشىندە بۇيىرعانى دا تاڭعالارلىق جاعداي. اينالدىرعان ەكى جىلدىڭ ىشىندە ەرەسەكتەر قۇراماسىنا ءوتىپ، 1998 جىلى جاستار اراسىنداعى الەم چەمپيوناتىنىڭ كۇمىسىن يەلەنگەن ساتتارحانوۆتان سيدنەي جۇلدەسىن كۇتكەندەر از ەدى. ءتىپتى، وليمپ شىڭىن باعىندىرادى دەگەن وي ەشكىمنىڭ تۇسىنە كىرمەگەن ەدى.
سيدنەي وليمپياداسىندا ول الەمنىڭ ەڭ ۇزدىك بوكسشىلارىن جۇلدەدەن قاقتى. اتاپ ايتار بولساق، العاشقى اينالىمدا رۋمىنيالىق وۆيديۋ بوبيرناتتى 14:5 ەسەبىمەن جەڭدى.
ەكىنشى كەزدەسۋدە وڭتۇستىك افريكا رەسپۋبليكاسىنىڭ وكىلىن 16:5 ەسەبىمەن ءسۇرىندىردى.
ساتتارحانوۆتىڭ سيدنەيدەگى ەڭ باستى جەكپە-جەگى دەپ رامازان پاليانيمەن وتكەن كەزدەسۋدى ايتۋعا بولادى. بۇكىل تۇرىك جۇرتىنىڭ ءۇمىتى، ەۋروپا چەمپيونى ءپاليانيدى 12:11 ەسەبىمەن ۇتقان سوڭ، بەكزاتتىڭ مىقتىلىعىن مويىندايتىندار قاتارى كوبەيدى.
جارتىلاي فينالا ماروككولىق ءتامسامانيدى 12 ۇپاي باسىمدىعىمەن جەڭگەن قازاق باتىرىن فينالدا باسقا ەمەس، 1999 جىلعى الەم چەمپيونى، امەريكالىق ريكاردو حۋارەس كۇتىپ تۇردى.
ايتسە دە، ازۋلى امەريكالىق تا بەكزاتقا ءتىسىن باتىرا العان جوق. سيدنەي وليمپياداسىنىڭ فينالىندا ساتتارحانوۆ حۋارەستى 22:14 ەسەبىمەن تازا جەڭىپ، قازاقستانعا تاريحي التىن جۇلدەنى سىيلادى.
ال دميتري بالاندين 1995 جىلى 4 ءساۋىر كۇنى الماتىدا دۇنيەگە كەلگەن. بويى 195, سالماعى – 85 كەلى. سۋدا ءجۇزۋ سپورتىمەن 2003 جىلى 8 جاسىنان باستاپ اينالىسا باستاعان. 2008-2012 جىلدارى الماتىداعى سپورتتاعى دارىندى بالالارعا ارنالعان مەكتەپ-ينتەرناتىندا وقىعان. بۇگىن سپورتشى 30-عا تولدى.
