فوتو: sport5.by
قازاقستاندىق تەننيسشى ەلەنا رىباكينا Tennis Abstract ساراپتامالىق پلاتفورماسىنىڭ ماۋسىمدىق yElo جانە جالپى Elo رەيتينگتەرىندە ءبىرىنشى ورىنعا جايعاستى. بۇل تۋرالى Sports.kz جازدى، دەپ حابارلايدى "ادىرنا".
ماۋسىمدىق yElo كورسەتكىشىندە رىباكينا 2166,8 ۇپايمەن كوش باستاپ تۇر. ەكىنشى ورىنعا 2146,1 ۇپاي جيناعان رەسەيلىك ميررا اندرەەۆا ورنالاسسا، ۇزدىك ۇشتىكتى 2144,0 ۇپايى بار امەريكالىق كوري گاۋفف تۇيىندەدى. اتالعان رەيتينگتە قازاقستاندىق سپورتشىنىڭ ەنشىسىندە 54 جەڭىس پەن 14 جەڭىلىس بار.
رىباكينا جالپى Elo رەيتينگىندە دە ۇزدىك اتاندى. ونىڭ كورسەتكىشى – 2159,2 ۇپاي. بۇل تىزىمدە بەلارۋس وكىلى ارينا سوبولەنكو 2139,0 ۇپايمەن ەكىنشى ورىنعا تۇراقتاسا، كوري گاۋفف 2128,2 ۇپايمەن ءۇشىنشى ساتىعا جايعاستى.
ايتا كەتەيىك، رەيتينگتەر 16 قاراشادا جاڭارتىلعان. yElo جۇيەسى تەننيسشىلەردىڭ ءبىر كۇنتىزبەلىك جىل ىشىندەگى ناتيجەلەرىن ەسكەرىپ، قارسىلاستارىنىڭ شەبەرلىگى مەن وتكىزگەن ماتچتارىنىڭ سانىنا قاراي ۇپايلاردى ەسەپتەيدى. ال جالپى Elo رەيتينگى سوڭعى 52 اپتاداعى ويىن ناتيجەلەرىنە نەگىزدەلگەن.
سونىمەن قاتار ەلەنا رىباكينا WTA-نىڭ رەسمي رەيتينگىندە دە ءبىرىنشى ورىندا تۇر. 16 قاراشاداعى مالىمەت بويىنشا، قازاقستاندىق تەننيسشىنىڭ قورجىنىندا 8099 ۇپاي بار. ول 7806 ۇپاي جيناعان ەڭ جاقىن قارسىلاسى ميررا اندرەەۆانى باسىپ وزىپ، كوشباسشىلىق ورنىن ساقتاپ كەلەدى.
