Búgin - eki birdeı Olımpıada chempıony týǵan kún. Biri - Sıdneı Olımpıadasynyń chempıony, boksshy Bekzat Sattarhanov, ekinshisi - sýǵa júzý sportynan Qazaqstan sport tarıhynda tuńǵysh altyn alǵan sportshy Dmıtrıı Balandın.
Bekzat Sattarhanov 1980 jyldyń 4 sáýirinde Túrkistan qalasynda dúnıege kelgen. 20 jasynda Olımp tuǵyryn baǵyndyrǵan batyr tiri bolsa búgin 45 jasqa tolar edi.
Kishkentaıynda ata-anasy Bekzatty sport úıirmesine berýdi jón sanap, kúres úıirmesine jazdyrady. Alaıda Bekzat kúresti qup kórmeı, 1995 jyldan bastap bylǵary qolǵapqa qumartqan.
Bekzattyń bokstaǵy ǵumyry bar-joǵy bes jylǵa sozylǵan. Keıbireýler úshin jyldar boıy baǵynbaı ketken Olımpıada bıigi Bekzatqa bes jyldyń ishinde buıyrǵany da tańǵalarlyq jaǵdaı. Aınaldyrǵan eki jyldyń ishinde eresekter quramasyna ótip, 1998 jyly jastar arasyndaǵy álem chempıonatynyń kúmisin ıelengen Sattarhanovtan Sıdneı júldesin kútkender az edi. Tipti, olımp shyńyn baǵyndyrady degen oı eshkimniń túsine kirmegen edi.
Sıdneı Olımpıadasynda ol álemniń eń úzdik boksshylaryn júldeden qaqty. Atap aıtar bolsaq, alǵashqy aınalymda rýmynııalyq Ovıdıý Bobırnatty 14:5 esebimen jeńdi.
Ekinshi kezdesýde Ońtústik Afrıka Respýblıkasynyń ókilin 16:5 esebimen súrindirdi.
Sattarhanovtyń Sıdneıdegi eń basty jekpe-jegi dep Ramazan Palıanımen ótken kezdesýdi aıtýǵa bolady. Búkil túrik jurtynyń úmiti, Eýropa chempıony Palıanıdi 12:11 esebimen utqan soń, Bekzattyń myqtylyǵyn moıyndaıtyndar qatary kóbeıdi.
Jartylaı fınala marokkolyq Tamsamanıdi 12 upaı basymdyǵymen jeńgen qazaq batyryn fınalda basqa emes, 1999 jylǵy álem chempıony, amerıkalyq Rıkardo Hýares kútip turdy.
Áıtse de, azýly amerıkalyq ta Bekzatqa tisin batyra alǵan joq. Sıdneı Olımpıadasynyń fınalynda Sattarhanov Hýaresti 22:14 esebimen taza jeńip, Qazaqstanǵa tarıhı altyn júldeni syılady.
Al Dmıtrıı Balandın 1995 jyly 4 sáýir kúni Almatyda dúnıege kelgen. Boıy 195, salmaǵy – 85 keli. Sýda júzý sportymen 2003 jyly 8 jasynan bastap aınalysa bastaǵan. 2008-2012 jyldary Almatydaǵy sporttaǵy daryndy balalarǵa arnalǵan mektep-ınternatynda oqyǵan. Búgin sportshy 30-ǵa toldy.
