بريتاندىق ءجۇزۋشى سوعىستىڭ ەكولوگيالىق زاردابىنا نازار اۋدارتۋ ءۇشىن ورمۋز بۇعازىن ءجۇزىپ ءوتتى

163
Adyrna.kz Telegram
https://adyrna.kz/storage/uploads/blmazsFR3wOSYG0cLl2UlA5tYtyWQHVdWJZP1wZQ.webp
فوتو: ليۋيس پيۋ قورى

 بريتاندىق مارافونشى-ءجۇزۋشى ليۋيس پيۋ يرانمەن اراداعى سوعىستىڭ ەكولوگياعا تيگىزگەن زاردابىنا نازار اۋدارتۋ ماقساتىندا ورمۋز بۇعازى ارقىلى ءۇش كۇندىك ءجۇزۋ ساپارىن اياقتادى. بۇل تۋرالى The Independent باسىلىمى جازدى، دەپ حابارلايدى "ادىرنا".

ءجۇزۋشى جالپى ۇزىندىعى شامامەن 15 شاقىرىم بولاتىن قاشىقتىقتى بىرنەشە كەزەڭگە ءبولىپ ءجۇزىپ وتكەن. باعىت ومان جاعالاۋىنداعى مۋساندام تۇبەگىنەن ورمۋز مۇيىسىنە دەيىن سوزىلعان.

56 جاستاعى ليۋيس ءپيۋدىڭ ايتۋىنشا، دۇيسەنبى كۇنى ءجۇزۋدى باستاعاننان كەيىن جارتى ساعات وتپەي-اق ەكى قاتتى جارىلىستىڭ داۋىسىن ەستىگەن. سول ساتتە وزىنەن شامامەن 4 شاقىرىم قاشىقتىقتا سنارياد مۇناي تانكەرىنە تيگەن. كەيىن ول Tara Gas گاز تاسىمالداۋشى كەمەسىنىڭ ورتەنىپ جاتقانىن كورگەن.

«وسى گاز تاسىمالداۋشى كەمەنىڭ جانىنان ءجۇزىپ وتكەن ءساتىمدى ەشقاشان ۇمىتپايمىن. الدىمەن حيميالىق زاتتاردىڭ ءيىسى سەزىلدى، سودان كەيىن جالىن اسپانعا وتتى شارلار سەكىلدى كوتەرىلدى. كەمەنىڭ اينالاسىنداعى سۋ دا جانىپ جاتتى»، – دەدى سپورتشى.

پيۋ قاقتىعىستىڭ ەكولوگيالىق زاردابى گۋمانيتارلىق شىعىنداردىڭ كولەڭكەسىندە قالىپ قوياتىنىن اتاپ ءوتتى.

«سوعىس ادامزاتقا وراسان زور قايعى-قاسىرەت اكەلەدى. ادامدار قازا تابادى، وتباسىلار ويران بولادى، ۇيلەر، اۋرۋحانالار مەن مەكتەپتەر قيرايدى. الايدا نازاردان تىس قالىپ جاتقان تاعى ءبىر قۇربان بار. ول – تابيعاتتىڭ ءوزى»، – دەپ جازدى ول ءوزىنىڭ سايتىندا.

ورمۋز بۇعازى الەمدىك مۇناي تاسىمالى ءۇشىن ماڭىزدى تەڭىز جولى عانا ەمەس، سونىمەن قاتار ەرەكشە تابيعي ايماقتاردىڭ ءبىرى سانالادى. ليۋيس پيۋ بۇل ءوڭىردى ءوزى كورگەن ەڭ ادەمى جەرلەردىڭ ءبىرى دەپ سيپاتتادى. مۇندا مارجان ريفتەرى، مانگر ورماندارى، ديۋگوندەر، تەڭىز تاسباقالارى مەن كيت اكۋلالارى مەكەندەيدى.

سپورتشىنىڭ ەسكەرتۋىنشە، مۇنايدىڭ توگىلۋى مەن حيميالىق زاتتاردان بولاتىن لاستانۋ وسى ەكوجۇيەلەرگە ۇزاق مەرزىمدى زيان كەلتىرۋى مۇمكىن. ونىڭ سالدارى ونداعان جىل بويى سەزىلۋى ىقتيمال.

ليۋيس پيۋ تاراپتاردى اسكەري ارەكەتتەردى توقتاتۋعا، ورمۋز بۇعازىن اشۋعا جانە لاستانعان سۋلاردى تازارتۋعا شاقىردى.

پىكىرلەر