بۇگىن جازۋشى مۇحتار اۋەزوۆتىڭ ۇلى، قوعام قايراتكەرى، مادەنيەتتانۋشى، عالىم مۇرات اۋەزوۆتىڭ تۋعان كۇنى. ول 80 جاسقا تولدى، دەپ حابارلايدى “ادىرنا” ۇلتتىق پورتالى.
مۇرات اۋەزوۆ 1943 جىلى 1 قاڭتاردا جامبىل وبلىسىندا دۇنيەگە كەلگەن. قازاقتىڭ زاڭعار جازۋشىسى مۇحتار اۋەزوۆ پەن فاتيما عابيتوۆانىڭ ۇلى. م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ شىعىس تىلدەرى ينستيتۋتىن "قىتاي فيلولوگياسى" ماماندىعى بويىنشا بىتىرگەن. قىزمەتتىك جولىندا باسشى دا، دەپۋتات تا، ەلشى دە بولعان.
سونداي-اق، ول قازاقستان جازۋشىلار وداعىنىڭ مۇشەسى، قازاقستان رەسپۋبليكاسىنىڭ ەڭبەك سىڭىرگەن قايراتكەرى، "التىن اسىق", "تارلان" سىيلىعىنىڭ لاۋرەاتى. "ۆرەمەن سۆيازۋششايا نيت", "يپپوكرەن", "ۋيتي، چتوبى ۆەرنۋت" ەڭبەكتەرىنىڭ اۆتورى.
ەلىمىزدىڭ عىلىمىن، كوركەم ادەبيەتىن، كينو ونەرى مەن تەلەۆيزياسىن دامىتۋعا ەلەۋلى ۇلەس قوستى. "جاس تۇلپار" بەيرەسمي جاستار قوزعالىسى مەن "نەۆادا-سەمەي" قوعامدىق قوزعالىسىن ۇيىمداستىرۋشىلاردىڭ ءبىرى. ۇلى جىبەك جولىن زەرتتەۋ مەن دامىتۋعا قوسقان ۇلەسى ءۇشىن يۋنەسكو-نىڭ قولا مەدالىمەن ماراپاتتالدى.
