بۇگىن قازاق ادەبيەتىنىڭ كورنەكتى وكىلى، قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى تۇمانباي مولداعاليەۆتىڭ تۋعانىنا 90 جىل تولدى.
تۇمانباي مولداعاليەۆ 1935 جىلى 20 ناۋرىزدا الماتى وبلىسى، ەڭبەكشىقازاق اۋدانى، جارسۋ اۋىلىندا دۇنيەگە كەلگەن. قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن تامامداعان. ادەبيەتتەگى العاشقى قادامدارىن «لەنينشىل جاس» (قازىرگى «جاس الاش») گازەتىندە باستادى. كەيىن «پيونەر» (قازىرگى «اق جەلكەن») جانە «بالدىرعان» جۋرنالدارىندا، سونداي-اق «جالىن» باسپاسىندا قىزمەت اتقاردى.
اقىننىڭ العاشقى ولەڭدەر جيناعى «ستۋدەنت داپتەرى» 1957 جىلى جارىق كوردى. ول ءوزىنىڭ سىرشىل، نازىك سەزىمگە تولى جىرلارىمەن حالىق جۇرەگىنەن ورىن الدى. «كاميلا»، «كوكتەم تاڭى»، «الاتاۋ قىزى»، «فەريۋزا تۋرالى جىر»، «زۋلايدى كۇندەر» سياقتى جيناقتارى قازاق پوەزياسىنىڭ التىن قورىنا ەندى.
تۇمانباي مولداعاليەۆ قازاق پوەزياسىندا تەك ولەڭدەرىمەن عانا ەمەس، سونداي-اق جۇرەككە جىلى تيەتىن ءان ماتىندەرىمەن دە كەڭ تانىلدى. ونىڭ سوزىنە جازىلعان 500-دەن استام ءان حالىق اراسىندا كەڭىنەن تارالعان.
بۇل اندەر ءالى كۇنگە دەيىن حالىقتىڭ ءسۇيىپ تىڭدايتىن شىعارمالارىنىڭ قاتارىندا.
تۇمانباي مولداعاليەۆ تەك اقىن عانا ەمەس، اۋدارماشى رەتىندە دە تانىلدى. ول بايرون، لەرمونتوۆ، تاراس شەۆچەنكو، راسۋل عامزاتوۆ، عاففار عۇلام سياقتى الەمدىك كلاسسيكتەردىڭ تۋىندىلارىن قازاق تىلىنە ءتارجىمالادى.
اقىننىڭ 13 جانە 14 تومدىق شىعارمالار جيناعى جارىق كورىپ، وقىرمان قاۋىمعا ۇسىنىلدى. ول فيزۋلي اتىنداعى حالىقارالىق تۇركى دۇنيەسى اقىندارى سىيلىعىمەن ماراپاتتالدى.
