قازاقستاننىڭ ءبىلىم بەرۋ سالاسىنداعى ماڭىزدى باسىلىمداردىڭ ءبىرى – «قازاقستان مۇعالىمى» گازەتىنە بيىل 90 جىل تولدى، دەپ حابارلايدى “ادىرنا” ۇلتتىق پورتالى.
باسىلىم العاش رەت 1935 جىلى «توتە وقۋ» دەگەن اتاۋمەن جارىق كورىپ، مەكتەپ مۇعالىمدەرىنە، وزدىگىنەن ساۋات اشۋشىلارعا ادىستەمەلىك كومەك كورسەتۋدى ماقسات ەتتى.
1939 جىلى گازەت اتاۋى «ساۋاتتى بولۋعا كومەكشى» بولىپ وزگەرتىلسە، 1940 جىلى قازاقستاندا لاتىن الىپبيىنەن ورىس گرافيكاسىنا كوشۋگە بايلانىستى «جاڭا جازۋ» دەگەن جاڭا اتاۋمەن قايتا شىقتى. 1952 جىلى باسىلىم قازىرگى «قازاقستان مۇعالىمى» اتاۋىن الدى. وسى كەزەڭنەن باستاپ گازەت اپتاسىنا ءبىر رەت شىعىپ، مۇعالىمدەر مەن وقۋشىلارعا ارنالعان ءتۇرلى ماتەريالدار جاريالاي باستادى.
1956 جىلدان باستاپ باسىلىمدا «پارتيا»، «مەكتەپ»، «عىلىم جانە ادەبيەت» سياقتى بولىمدەر پايدا بولدى. سونداي-اق، «ۋچيتەل كازاحستانا» اتتى ورىس تىلىندەگى نۇسقاسى قاتار جارىق كوردى. گازەتتە تەك ءبىلىم بەرۋ ماسەلەلەرى عانا ەمەس، مۇعالىمدەر مەن وقۋشىلاردىڭ ءوزارا قارىم-قاتىناسى، سويلەۋ مادەنيەتى، ادەپ نورمالارى جونىندەگى ماقالالار دا جاريالانىپ وتىردى..
