بۇگىن - ادەبيەت مايتالمانى، اقىن ءابدىلدا تاجىباەۆتىڭ تۋعان كۇنى، دەپ حابارلايدى "ادىرنا" ءتىلشىسى.
قازاق اقىنى، دراماتۋرگ، ادەبيەت زەرتتەۋشى عالىم 1909 جىلى سىر وڭىرىندە ومىرگە كەلگەن.
ءابدىلدا تاجىباەۆ اناسىنان ءبىلىم الىپ، ساۋاتىن اشقان. كەيىننەن ولەڭگە، ادەبيەتكە دەگەن قۇشتارلىعى دا ناعاشىلارىندا ءجۇرىپ، بايقالعان.
جازۋشىلار وداعىنىڭ مۇشەسى 1922 جىلى قىزىلوردا قالاسىندا جاڭادان اشىلعان جەتىم بالالارعا ارنالعان ينتەرناتتا ءبىلىم الىپ، ساۋاتتىلىعىنىڭ ارقاسىندا باستاۋىش مەكتەپتىڭ 3-سىنىبىنا اۋىسىپ كەتەدى.
ءابدىلدانىڭ العاشقى ولەڭدەرى وسى ينتەرناتتىڭ قابىرعا گازەتىندە جاريالانادى.
ەڭبەك جولىن "ەڭبەكشى قازاق" گازەتىندە الدىمەن پوشتا تاسۋشى بولىپ باستاپ، سودان كەيىن كوررەكتور بولىپ جۇمىس ىستەگەن. كەيىننەن "لەنينشىل جاس" گازەتى رەداكتورىنىڭ ورىنباسارى بولدى. ءابدىلدا تاجىباەۆتىڭ باسپا بەتىندەگى تۇڭعىش تۋىندىسى - "جۇمىسشىنىڭ گۋدوگى" ولەڭى. ول 1926 جىلى "جۇمىسشى" گازەتىندە باسىلدى.
اقىننىڭ «جاڭا ىرعاق»، «ارالدار»، «كەشەدەن بۇگىنگە»، «جارتاس»، «جاڭا ورىمدەر»، «قۇرداستار»، «تولاعاي» جانە 5 تومدىق جىر جيناقتارى جارىق كورگەن. «مايرا»، «جارتاس»، «جالعىز اعاش ورمان ەمەس»، «كوڭىلدەستەر»، «توي بولاردا»، «دۋباي شۋباەۆيچ» ت. ب. پەسالارى ساحنالاردا قويىلعان. «ءومىر جانە پوەزيا»، «قازاق دراماتۋرگياسىنىڭ دامۋى مەن قالىپتاسۋى»، «جىلدار، ويلار» زەرتتەۋ ەڭبەكتەرى وقىلدى. تاجىباەۆ ۇزاق شىعارماشىلىق عۇمىرىندا تىنىمسىز ىزدەنىپ، ۇزدىكسىز ەڭبەكتەنىپ، تۇتاس ءبىر ءداۋىر شىندىعىن جان-جاقتى، جوعارى كوركەمدىكپەن بەينەلەگەن اقىن.
ءبىر قىزىعى - وتكەن عاسىردىڭ وتىزىنشى جىلدارعى قۋعىن-سۇرگىن كەزىندە سوۆەت رەجيمىنىڭ رەسپرەسسيالىق ناۋقانىندا تاجىباەۆتىڭ دا اتى اتالادى. سول كەزدە رەجيم ءسوزىن سويلەگەن اقىن كەيىن "اقتاڭداقتار" حالقىمەن قاۋىشقاندا، ءبىر كەزدە قۋعىندالعان قالامگەرلەردىڭ كىتابىنا العىس ءسوز جازدى.
