Búgin qazaq ádebıetiniń kórnekti ókili, Qazaqstannyń Halyq jazýshysy, Memlekettik syılyqtyń laýreaty Tumanbaı Moldaǵalıevtiń týǵanyna 90 jyl toldy.
Tumanbaı Moldaǵalıev 1935 jyly 20 naýryzda Almaty oblysy, Eńbekshiqazaq aýdany, Jarsý aýylynda dúnıege kelgen. Qazaq memlekettik ýnıversıtetiniń fılologııa fakýltetin támamdaǵan. Ádebıettegi alǵashqy qadamdaryn «Lenınshil jas» (qazirgi «Jas Alash») gazetinde bastady. Keıin «Pıoner» (qazirgi «Aq jelken») jáne «Baldyrǵan» jýrnaldarynda, sondaı-aq «Jalyn» baspasynda qyzmet atqardy.
Aqynnyń alǵashqy óleńder jınaǵy «Stýdent dápteri» 1957 jyly jaryq kórdi. Ol óziniń syrshyl, názik sezimge toly jyrlarymen halyq júreginen oryn aldy. «Kámıla», «Kóktem tańy», «Alataý qyzy», «Ferıýza týraly jyr», «Zýlaıdy kúnder» sııaqty jınaqtary qazaq poezııasynyń altyn qoryna endi.
Tumanbaı Moldaǵalıev qazaq poezııasynda tek óleńderimen ǵana emes, sondaı-aq júrekke jyly tıetin án mátinderimen de keń tanyldy. Onyń sózine jazylǵan 500-den astam án halyq arasynda keńinen taralǵan.
Bul ánder áli kúnge deıin halyqtyń súıip tyńdaıtyn shyǵarmalarynyń qatarynda.
Tumanbaı Moldaǵalıev tek aqyn ǵana emes, aýdarmashy retinde de tanyldy. Ol Baıron, Lermontov, Taras Shevchenko, Rasýl Ǵamzatov, Ǵaffar Ǵulam sııaqty álemdik klassıkterdiń týyndylaryn qazaq tiline tárjimalady.
Aqynnyń 13 jáne 14 tomdyq shyǵarmalar jınaǵy jaryq kórip, oqyrman qaýymǵa usynyldy. Ol Fızýlı atyndaǵy halyqaralyq túrki dúnıesi aqyndary syılyǵymen marapattaldy.
