بىلتىر جاڭا جىلدى تويلاۋعا استانا قالاسى 836 ملن تەڭگە ءبولىپتى. الماتىلىق سالىق تولەۋشىلەردىڭ 800 ملن تەڭگەسى قالانى بەزەندىرۋگە، جىلتىراقتار مەن ەرتەگى كەيىپكەرلەرىنىڭ ءمۇسىنىن ورناتۋعا جۇمسالعان. شىمكەنت اكىمدىگى شىرشا قۇرۋ، وتشاشۋ دەپ 80 ميلليون تەڭگەنى شاشىپ جىبەرگەن. وزگە وبلىستار دا جاڭاجىلدىق توي-تومالاققا قىرۋار قارجى ءبولدى.
ال ەندى مىنا قىزىقتى قاراڭىز! قازاقشا جىل باسى سانالاتىن ناۋرىز مەيرامىنا بيۋدجەتتەن ءبىر تيىن بولىنبەگەن. تەك 2024 جىلى الماتى اكىمدىگى مەرەكەلىك شارالارعا بايلانىستى باننەرلەر جاساۋعا جانە ورنالاستىرۋعا دەپ 71 ملن تەڭگەگە تەندەر جاريالاعان. ءتىپتى قارجى ءمينيسترى ءمادي تاكيەۆتىڭ ءوزى ناۋرىزدى تويلاۋعا رەسپۋبليكالىق بيۋدجەتتەن ءبىر تيىن قاراستىرىلماعان دەپتى بىلتىر.
دەمەك، ناۋرىز مەرەكەسى ءالى دە مەملەكەتتىك دەڭگەيدە تويلانىپ جاتقان جوق. كەي وڭىرلەردە ءتىپتى جەتىم قىزدىڭ تويىنداي جۇپىنى وتەدى. گريگوريان كۇنتۇزبەسىندەگى جاڭا جىلعا ميلليونداپ اقشا بولەتىن اكىمدەر، كۇن مەن ءتۇن تەڭەلەر تۇستا تارىلىپ قالاتىنى نەس؟
ايتەۋىر بىلتىردان بەرى "ناۋرىزناما" تۇجىرىمداماسى بەكىتىلىپ، ۇلىستىڭ ۇلى توعىز كۇن تويلاناتىن بولدى. بىراق ءالى دە ناۋقانشىلدىققا سالىنىپ جاتىرمىز. ماسەلەن، بۇگىن بيۋدجەتنيكتەر مەن مەم. قىزمەتكەرلەر جاپپاي ويۋلى شاپاندارىن جامىلىپ الىپتى. ءار مەكەمەمە ۇلتتىق كيىممەن روليك ءتۇسىرىپ، الەم جەلىگە تاراتسىن دەگەن تاپسىرما دا بولعان سياقتى. سوندىقتان الماتىنىڭ باراحولكاسىنداعى "قىرعىز ريادتا" قىرعىن ساۋدا بولىپ جاتىر بۇگىن. ال، ەرتەڭنەن باستاپ ەۋروپالىق ۇلگىمەن قىتايدا تىگىلگەن شۇبەرەكتەرىمىزدى كيىپ الامىز. كوبوياۋشىلىق ايتەۋىر...
