جەتىسۋ وبلىسىنىڭ ورتالىعى تالدىقورعان قالاسىندا «عاجايىپقا تولعان جاڭا جىل!» اتتى پرەزيدەنتتىك شىرشا ءوتتى. جاڭا جىل قارساڭىنداعى مەرەكەلىك شاراعا ءوڭىردىڭ تۇكپىر-تۇكپىرىنەن كەلگەن 200 بالا قاتىستى.
بالالار ءۇشىن ەرتەگى كەيىپكەرلەرىنىڭ، انيماتورلاردىڭ، تسيرك ارتىستەرى مەن شىعارماشىلىق ۇجىمداردىڭ قاتىسۋىمەن اسەرلى شوۋ-باعدارلاما ۇيىمداستىرىلدى. ەرەكشە كەيىپكەرلەردىڭ ءبىرى رەتىندە جاساندى ينتەللەكتىڭ كومەگىمەن باسقارىلاتىن روبوتتى اتاپ وتۋگە بولادى. سونداي-اق ءتۇرلى ويىندار، بايقاۋلار مەن سايىستار وتكىزىلدى. بالالاردى كەلە جاتقان 2026 جاڭا جىلمەن جەتىسۋ وبلىسىنىڭ اكىمى بەيبىت يساباەۆ قۇتتىقتادى.
«جاستار» سپورت سارايىندا وتكەن مەرەكەلىك شاراعا كوپبالالى جانە از قامتىلعان وتباسىلاردان شىققان بالالار، بالالاردى قولداۋ ورتالىعىنىڭ تاربيەلەنۋشىلەرى، اتا-اناسىنىڭ قامقورلىعىنسىز قالعان بالالار، ەرەكشە ءبىلىم بەرۋدى قاجەت ەتەتىن بالالار، سونداي-اق وقۋدا، سپورتتا، شىعارماشىلىقتا جەتىستىككە جەتكەن جاس ورەندەر شاقىرىلدى.
مەرەكە فلەشموب بيىمەن باستالىپ، انيماتورلار مەن بالالاردىڭ كوركەمونەرپازدار ۇجىمدارى قاتىسقان تەاترلاندىرىلعان قويىلىممەن جالعاستى.
بالالاردى مەملەكەت باسشىسىنىڭ اتىنان وبلىس اكىمى قۇتتىقتادى:
– بۇل تاماشا مەرەكە ەلىمىزدىڭ پرەزيدەنتى قاسىم-جومارت كەمەلۇلى توقاەۆتىڭ اتىنان ۇيىمداستىرىلىپ وتىر. پرەزيدەنتتىك شىرشاعا ءوڭىرىمىزدىڭ ءاربىر اۋدانى مەن قالاسىنان ۇلگىلى، ءتارتىپتى، دارىندى بالالار شاقىرىلدى. بۇگىن وزدەرىڭنىڭ وسى ۇزدىكتەردىڭ قاتارىندا بولعاندارىڭدى ماقتان تۇتامىز. وقۋدا، ونەردە، سپورتتا جاڭا جەتىستىكتەرگە جەتە بەرىڭدەر. بۇگىنگى مەرەكە سەندەرگە مول قۋانىش، جارقىن اسەر، جىلى ەستەلىك سىيلاسىن، – دەگەن ب. يساباەۆ بالالارعا جاڭا جىلدىق سىيلىقتار تابىس ەتتى.
پرەزيدەنتتىك شىرشاعا قاتىسقان ءار بالا مەملەكەت باسشىسىنىڭ اتىنان قۇتتىقتاۋ حاتتارىن، پلانشەتتەر مەن جاڭا جىلدىق ءتاتتى سىيلىقتار الدى.
مەرەكەلىك شارا بارىسىندا اياز اتا مەن اقشاقار بالالار ءۇشىن جاڭا جىلدىق شىرشانى جارقىراتا جاقتى. تسيرك ارتىستەرى، انيماتورلار، قازاق حالىق ەرتەگىلەرى مەن مۋلتفيلم كەيىپكەرلەرى ونەر كورسەتىپ، مەرەكەگە ەرەكشە رەڭ بەردى.
سونىمەن قاتار جارىق شوۋى ۇيىمداستىرىلىپ، ءتۇرلى كوڭىلدى بايقاۋلار وتكىزىلدى. بالالار ولەڭ وقىپ، ءان ايتىپ، بي بيلەدى. مەرەكەلىك شارا سوڭىندا جاس قوناقتارعا ءارتۇرلى دامدەر مەن ءتاتتى تاعامدار ۇسىنىلدى.
جاڭا جىل قارساڭىنداعى مەرەكەگە كەلگەن بالالار اسەرىن ءبولىستى.
– ءبىزدىڭ وتباسىمىز كوپبالالى، ءبارىمىز تاتۋ تۇرامىز، ءبىر-بىرىمىزگە ءاردايىم كومەكتەسەمىز. قازىر قاراتال اۋدانى جەتىجال ورتا مەكتەبىنىڭ 5-سىنىبىندا وقيمىن. ساباقتا ۇزدىكتەر قاتارىندامىن. «زەردە» اۋداندىق زەرتتەۋ جوباسىنىڭ جۇلدەگەرىمىن، «كەنگۋرۋ» زياتكەرلىك ويىن بايقاۋىنىڭ، سونداي-اق «دارىن» رەسپۋبليكالىق عىلىمي-پراكتيكالىق ورتالىعى ۇيىمداستىرعان «اقبوتا» زياتكەرلىك وليمپياداسىنىڭ جۇلدەگەرىمىن. بۇگىنگى شىرشا مەرەكەسى كوڭىلدى ءارى قىزىقتى بولدى، ماعان قاتتى ۇنادى. بارلىق دوستارىمدى جاڭا جىلمەن قۇتتىقتايمىن، – دەدى كوكسۋ اۋدانى جەتىجال ورتا مەكتەبىنىڭ 5-سىنىپ وقۋشىسى ايزەرە بازاربەكقىزى.
«اينالايىن» بالالاردى قولداۋ ورتالىعىنىڭ تاربيەلەنۋشىسى رۇستەم قاليبەكوۆ تە پرەزيدەنتتىك شىرشاعا قاتىسۋشىلاردى مەرەكەگە وراي قۇتتىقتادى:
– مەن ساباقتى ۇزدىك وقيمىن، ءان ايتقاندى، اكتەرلىكتى جاقسى كورەمىن، سپورتقا قىزىعامىن. اۋىر اتلەتيكادان وبلىس چەمپيونىمىن، «جاس سارباز» كلۋبىنىڭ بەلسەندى مۇشەسىمىن. جاڭا جىلدى اسىعا كۇتىپ ءجۇرمىن. بۇگىن پرەزيدەنتتىك شىرشاعا شاقىرىلعانىما وتە قۋانىشتىمىن. الداعى جىلى دا ءوز ارماندارىما جەتۋ ءۇشىن العا ۇمتىلامىن، – دەدى ول.
اتاپ وتسەك، وسىنداي مەرەكەلىك شارالار ءوڭىردىڭ بارلىق اۋدان-قالالارىندا وتكىزىلىپ، وندا تاعى 2 مىڭنان استام بالا قامتىلماق.
