Byltyr jańa jyldy toılaýǵa Astana qalasy 836 mln teńge bólipti. Almatylyq salyq tóleýshilerdiń 800 mln teńgesi qalany bezendirýge, jyltyraqtar men ertegi keıipkerleriniń músinin ornatýǵa jumsalǵan. Shymkent ákimdigi shyrsha qurý, otshashý dep 80 mıllıon teńgeni shashyp jibergen. Ózge oblystar da jańajyldyq toı-tomalaqqa qyrýar qarjy bóldi.
Al endi myna qyzyqty qarańyz! Qazaqsha jyl basy sanalatyn Naýryz meıramyna bıýdjetten bir tıyn bólinbegen. Tek 2024 jyly Almaty ákimdigi merekelik sharalarǵa baılanysty bannerler jasaýǵa jáne ornalastyrýǵa dep 71 mln teńgege tender jarııalaǵan. Tipti Qarjy mınıstri Mádı Tákıevtiń ózi Naýryzdy toılaýǵa respýblıkalyq bıýdjetten bir tıyn qarastyrylmaǵan depti byltyr.
Demek, Naýryz merekesi áli de memlekettik deńgeıde toılanyp jatqan joq. Keı óńirlerde tipti jetim qyzdyń toıyndaı jupyny ótedi. Grıgorıan kúntúzbesindegi jańa jylǵa mıllıondap aqsha bóletin ákimder, kún men tún teńeler tusta tarylyp qalatyny nes?
Áıteýir byltyrdan beri "Naýryznama" tujyrymdamasy bekitilip, Ulystyń Uly toǵyz kún toılanatyn boldy. Biraq áli de naýqanshyldyqqa salynyp jatyrmyz. Máselen, búgin bıýdjetnıkter men mem. qyzmetkerler jappaı oıýly shapandaryn jamylyp alypty. Ár mekememe ulttyq kıimmen rolık túsirip, álem jelige taratsyn degen tapsyrma da bolǵan sııaqty. Sondyqtan Almatynyń Baraholkasyndaǵy "qyrǵyz rıadta" qyrǵyn saýda bolyp jatyr búgin. Al, erteńnen bastap eýropalyq úlgimen Qytaıda tigilgen shúberekterimizdi kıip alamyz. Kóboıaýshylyq áıteýir...
