ەلىمىزدە بۇگىننەن باستاپ جاڭا سالىق كودەكسى قولدانىسقا ەنگىزىلدى، دەپ حابارلايدى "ادىرنا" ۇلتتىق پورتالى.
جاڭا قۇجاتتا سالىق سالۋدىڭ نەگىزگى قاعيداتتارى ايقىندالىپ، سالىقتار مەن بيۋدجەتكە تولەنەتىن وزگە دە مىندەتتى تولەمدەردى بەلگىلەۋ، ەنگىزۋ، وزگەرتۋ، كۇشىن جويۋ، ەسەپتەۋ جانە تولەۋ ءتارتىبى رەتتەلگەن. سونىمەن قاتار، سالىقتىق مىندەتتەمەلەردى ورىنداۋعا بايلانىستى قوعامدىق قاتىناستار قامتىلعان.
جاڭا سالىق كودەكسىندەگى نورمالار ازاماتتاردىڭ تابىسىنا، جۇمىس بەرۋشىلەردىڭ شىعىندارىنا، سونداي-اق كومپانيالار مەن كاسىپكەرلەردىڭ سالىقتىق جۇكتەمەسىنە تىكەلەي اسەر ەتەدى.
جىلدىق تابىسقا سالىناتىن جەكە تابىس سالىعى (جتس) پروگرەسسيۆتى شكالا بويىنشا بەلگىلەنگەن. ياعني، 8 500 اەك-كە دەيىن (36 762 500 تەڭگە) – 10%. ال 8500 اەك-تەن جوعارى – 15%.
ال جەكە تاجىريبەمەن اينالىساتىن تۇلعالار ءۇشىن جتس مولشەرلەمەسى 9% بولىپ بەكىتىلدى.
ديۆيدەندتەرگە سالىناتىن سالىق تا پروگرەسسيۆتى جۇيەگە كوشتى.
230 000 اەك-كە دەيىن (994 750 000 تەڭگە) – 5%، كورسەتىلگەن سومادان جوعارى – 15%.
جالپى سالىق رەجيمىندەگى جەكە كاسىپكەرلەر ءۇشىن 230 000 اەك-كە دەيىن – 10%، ودان جوعارى – 15%.
نەگىزگى سالىق شەگەرىمى ايىنا 30 اەك (129 750 تەڭگە), جىلىنا ەڭ كوبى 360 اەك كولەمىندە بەلگىلەندى. سونىمەن قاتار، مۇگەدەكتىگى بار ازاماتتار مەن ارداگەرلەر سياقتى جەكەلەگەن ساناتتارعا الەۋمەتتىك سالىقتىق شەگەرىمدەر قاراستىرىلعان.
ال كاسىپكەرلەر ءۇشىن قوسىلعان قۇن سالىعىنىڭ (ققس) ستاندارتتى مولشەرلەمەسى اينالىمدار مەن يمپورت ءۇشىن 16% بولىپ بەكىتىلدى.
وتاندىق باسپا ونىمدەرىنە ققس – 10%.
ەڭبەكاقى قورىنان تولەنەتىن بىرىڭعاي تولەم مولشەرى كەزەڭ-كەزەڭىمەن وسەدى.
2026 جىلى – 24,8% بولسا، 2027 جىلى – 25,8%، 2028 جىلى – 26,3% بولادى.
بۇل تولەمگە جەكە تابىس سالىعى، زەينەتاقى جارنالارى، الەۋمەتتىك اۋدارىمدار جانە مىندەتتى الەۋمەتتىك مەديتسينالىق ساقتاندىرۋ كىرەدى.
