اقش- پرەزيدەنتى دونالد ترامپ يراننىڭ جوعارعى باسشىسى اياتوللا ءالي حامەنەيگە يادرولىق كەلىسسوزدەرگە قاتىستى حات جولداعانىن مالىمدەدى، دەپ حابارلايدى "ادىرنا" ۇلتتىق پورتالى ABC News-كە سىلتەمە جاساپ.
"يران ماسەلەسىن شەشۋدىڭ ەكى جولى بار: اسكەري شارا نەمەسە كەلىسىمگە كەلۋ. مەن كەلىسىم جاساۋدى ءجون كورەمىن", – دەدى ترامپ.
ول ەگەر كەلىسىمگە قول جەتكىزىلمەسە، اسكەري ارەكەتتەرگە بارۋى مۇمكىن ەكەنىن ەسكەرتتى.
"ۋاقىت تاياپ قالدى. بىردەڭە بولاتىنى انىق. مەن ولارعا حات جازىپ، كەلىسسوز جۇرگىزۋگە شاقىردىم. ەگەر ءبىز سوعىسقا ارالاسۋعا ءماجبۇر بولساق، بۇل يران ءۇشىن ۇلكەن اپاتقا اينالادى", – دەدى ول.
الايدا يراننىڭ بۇۇ-داعى تۇراقتى وكىلدىگى ترامپتان ەشقانداي حات الماعانىن مالىمدەدى.
ترامپ يران باسشىلىعىنا ۋلتيماتۋم قويماعانىن ايتتى.
ء"بىز بىردەڭە ىستەۋىمىز كەرەك، ويتكەنى يراننىڭ يادرولىق قارۋعا يە بولۋىنا جول بەرۋگە بولمايدى", – دەپ ەسكەرتتى.
2019 جىلى اقش پرەزيدەنتى جاپونيانىڭ بۇرىنعى پرەمەر-ءمينيسترى سيندزو ابەنىڭ كومەگىمەن ۇقساس ۇسىنىس جولداعان. الايدا، اياتوللا حامەنەي ودان باس تارتقان.
"مەن ترامپپەن ەشقانداي حات الماستىرۋدى ءجون كورمەيمىن", – دەگەن ەدى يران باسشىسى سول كەزدە.
ەسكە سالا كەتسەك، ترامپ اقش پرەزيدەنتى بولعان كەزىندە يران مەن وباما اكىمشىلىگى اراسىندا جاسالعان يادرولىق كەلىسىمنەن بىرجاقتى شىققان بولاتىن.
2015 جىلى قابىلدانعان بۇل كەلىسىم يرانعا ۋراندى 3,67%-عا دەيىن بايىتۋعا جانە 300 كگ-نان اسپايتىن قور جيناۋعا مۇمكىندىك بەرگەن.
وتكەن ايدا ترامپ يرانعا "ماكسيمالدى قىسىم كورسەتۋ" تۋرالى مەموراندۋمعا قول قويدى. بۇل قۇجات يران مۇنايىنىڭ ەكسپورتىن شەكتەۋدى كوزدەيدى، وسىلايشا تەگەراندى يادرولىق قارۋ جاساۋدان باس تارتۋعا ماجبۇرلەۋ ماقساتى قويىلعان.
