AQSh- prezıdenti Donald Tramp Irannyń Joǵarǵy basshysy aıatolla Álı Hameneıge ıadrolyq kelissózderge qatysty hat joldaǵanyn málimdedi, dep habarlaıdy "Adyrna" ulttyq portaly ABC News-ke silteme jasap.
"Iran máselesin sheshýdiń eki joly bar: áskerı shara nemese kelisimge kelý. Men kelisim jasaýdy jón kóremin", – dedi Tramp.
Ol eger kelisimge qol jetkizilmese, áskerı áreketterge barýy múmkin ekenin eskertti.
"Ýaqyt taıap qaldy. Birdeńe bolatyny anyq. Men olarǵa hat jazyp, kelissóz júrgizýge shaqyrdym. Eger biz soǵysqa aralasýǵa májbúr bolsaq, bul Iran úshin úlken apatqa aınalady", – dedi ol.
Alaıda Irannyń BUU-daǵy turaqty ókildigi Tramptan eshqandaı hat almaǵanyn málimdedi.
Tramp Iran basshylyǵyna ýltımatým qoımaǵanyn aıtty.
"Biz birdeńe isteýimiz kerek, óıtkeni Irannyń ıadrolyq qarýǵa ıe bolýyna jol berýge bolmaıdy", – dep eskertti.
2019 jyly AQSh prezıdenti Japonııanyń burynǵy premer-mınıstri Sındzo Abeniń kómegimen uqsas usynys joldaǵan. Alaıda, aıatolla Hameneı odan bas tartqan.
"Men Tramppen eshqandaı hat almastyrýdy jón kórmeımin", – degen edi Iran basshysy sol kezde.
Eske sala ketsek, Tramp AQSh prezıdenti bolǵan kezinde Iran men Obama ákimshiligi arasynda jasalǵan ıadrolyq kelisimnen birjaqty shyqqan bolatyn.
2015 jyly qabyldanǵan bul kelisim Iranǵa ýrandy 3,67%-ǵa deıin baıytýǵa jáne 300 kg-nan aspaıtyn qor jınaýǵa múmkindik bergen.
Ótken aıda Tramp Iranǵa "maksımaldy qysym kórsetý" týraly memorandýmǵa qol qoıdy. Bul qujat Iran munaıynyń eksportyn shekteýdi kózdeıdi, osylaısha Tegerandy ıadrolyq qarý jasaýdan bas tartýǵa májbúrleý maqsaty qoıylǵan.
