قازاقستان پرەزيدەنتى قاسىم-جومارت توقاەۆ ەۋرازيالىق ەكونوميكالىق فورۋمىندا رەسەي مەن بەلارۋس وداقتاستىعى تۋرالى ءسوز قوزعاپ، ءتىپتى ەكى ەلدىڭ يادرولىق قارۋى دا ورتاق ەكەنىن اتاپ وتكەن ەدى. بۇل ماسەلەگە قاتىستى بەلارۋس باسشىسى الەكساندر لۋكاشەنكو پىكىر ءبىلدىردى، دەپ حابارلايدى «ادىرنا» ءتىلشىسى.
«يادرولىق قارۋ تۋرالى اڭگىمەنى، شىنى كەرەك، اكۋستيكانىڭ كەسىرىنەن دۇرىس ەستي المادىم. سول كەزدە ۆلاديمير ۆلاديميروۆيچ (رەسەي پرەزيدەنتى — رەد.) رەسەيلىك ستراتەگيالىق ەمەس يادرولىق قارۋ تۇرلەرىن بەلارۋس اۋماعىندا ورنالاستىرۋ تۋرالى شەشىم قابىلدانعانىن مالىمدەدى. مەن راقمەتىمدى ايتتىم»،—دەدى ول.
ايتا كەتەيىك، بۇعان دەيىن ەكى ەلدىڭ قورعانىس ءمينيسترى سەرگەي شويگۋ مەن ۆيكتور حرەنين مينسكىدە بەلارۋس رەسپۋبليكاسىنىڭ اۋماعىنداعى ارنايى قويمادا رەسەيلىك ستراتەگيالىق ەمەس يادرولىق قارۋدى ۇستاۋ ءتارتىبىن انىقتايتىن قۇجاتتارعا قول قويعانى حابارلانعان ەدى. شويگۋ رەسەي مەن بەلارۋس جۇزەگە اسىراتىن شارالار بارلىق قولدانىستاعى حالىقارالىق-قۇقىقتىق مىندەتتەمەگە سايكەس كەلەتىنىن اتاپ ءوتتى.
