اقش كونگرەسىندەگى دەموكراتيالىق پارتيا وكىلدەرى پرەزيدەنت دونالد ترامپ پەن ونىڭ اكىمشىلىگىنىڭ ۋكرايناعا قاتىستى ساياساتىن سىنعا الدى، دەپ حابارلايدى “ادىرنا” ۇلتتىق پورتالى.
دەموكراتتار كوشباسشىسى حاكيم دجەففريس ترامپتىڭ ارەكەتتەرىن “امەريكا ءۇشىن ۇيات جاعداي” دەپ اتاپ، ونىڭ ۇستانىمى رەسەي پرەزيدەنتى ۆلاديمير ءپۋتيننىڭ مۇددەسىنە جۇمىس ىستەيتىنىن ايتتى.
“پرەزيدەنت زەلەنسكي مەن ۋكراين حالقى ءۇش جىل بويى دەموكراتيا، بوستاندىق جانە شىندىق جولىندا كۇرەسىپ كەلەدى. ولاردىڭ جەڭىسى – اقش-تىڭ ۇلتتىق قاۋىپسىزدىگى ءۇشىن ماڭىزدى. ءبىز ۋكرايناعا تولىقتاي قولداۋ كورسەتۋىمىز كەرەك”، – دەدى دجەففريس.
سەناتور-دەموكرات دجەك ريد تە اق ۇيدەگى كەزدەسۋدى “ساياسي قاستاندىق” جانە “امەريكا باسشىلىعىنىڭ ماسقاراسى” دەپ باعالادى. ونىڭ ايتۋىنشا، ۋكراينا مەن ونىڭ حالقى ءومىر ءسۇرۋ ءۇشىن كۇرەسىپ جاتىر، ال ترامپ پەن ونىڭ وداقتاستارى “ۋكراينا مەن وداقتاستارىمىزدى كەلەمەجدەۋدە”.
سەناتتاعى دەموكراتتار كوشباسشىسى چاك شۋمەر ترامپتىڭ ساياساتىن قاتاڭ ايىپتاپ، ونى “اقش-تى ۋلتراوڭشىل اۆتوريتارلىق وليگارحياعا اينالدىردى” دەپ مالىمدەدى.
سەناتور دجينن شاحين دە ترامپتىڭ ارەكەتتەرى اقش-تىڭ حالىقارالىق بەدەلىنە نۇقسان كەلتىرەتىنىن ايتىپ، “پرەزيدەنت ۋكراينا الدىنداعى مىندەتتەمەلەرىنەن باس تارتىپ، ءپۋتيننىڭ قانداي قانىپەزەر ديكتاتور ەكەنىن تۇسىنبەي وتىر” دەپ سىنادى.
دەموكراتتار ترامپ پەن ۆيتسە-پرەزيدەنت دجەي دي ۆەنستىڭ ۋكراينا پرەزيدەنتى ۆلاديمير زەلەنسكيمەن كەزدەسۋىن سىنعا العان باسقا دا مالىمدەمەلەر جاسادى. ولار اقش-تىڭ ۋكرايناعا قولداۋ كورسەتۋى الەمدىك تۇراقتىلىق ءۇشىن ماڭىزدى ەكەنىن العا تارتتى.
