ۋكراينا پرەزيدەنتى ۆلاديمير زەلەنسكي اقش پرەزيدەنتى دونالد ترامپپەن اق ۇيدەگى كەزدەسۋدەن كەيىن العاشقى مالىمدەمەسىن جاسادى، دەپ حابارلايدى "ادىرنا" ۇلتتىق پورتالى.
"راحمەت، امەريكا، قولداۋىڭ ءۇشىن راحمەت، وسى ساپار ءۇشىن راحمەت. پرەزيدەنتكە، كونگرەسسكە جانە امەريكا حالقىنا راحمەت. ۋكرايناعا ءادىل ءارى تۇراقتى بەيبىتشىلىك كەرەك، ءبىز سول ءۇشىن جۇمىس ىستەپ جاتىرمىز", – دەپ جازدى زەلەنسكي X الەۋمەتتىك جەلىسىندە.
28 اقپاندا اق ۇيدە ۋكراينا مەن رەسەي اراسىنداعى بەيبىت كەلىسىمگە قاتىستى جوعارى دەڭگەيدەگى كەلىسسوز ءوتتى. وعان اقش پرەزيدەنتى دونالد ترامپ، ۋكراينا پرەزيدەنتى ۆلاديمير زەلەنسكي جانە اقش ۆيتسە-پرەزيدەنتى دجەي دي ۆەنس قاتىستى. الايدا، كەزدەسۋ بارىسىندا تاراپتار اراسىندا قاتتى كيكىلجىڭ تۋىنداپ، ناتيجەسىندە ءباسپاسوز كونفەرەنتسياسى وتپەي قالدى.
كەزدەسۋ الدىندا زەلەنسكي رەسەي پرەزيدەنتى ۆلاديمير پۋتينمەن كەلىسىمگە كەلۋ مۇمكىن ەمەستىگىن ايتتى. ال ترامپ الەم ءۇشىنشى دۇنيەجۇزىلىك سوعىس الدىندا تۇرعانىن مالىمدەدى.
جانجالدان كەيىن ۋكراينا دەلەگاتسياسى اق ۇيدەن كەتىپ قالدى.
كەلىسسوزدەن كەيىن كوپ ۇزاماي اق ءۇي بۇل جايتقا قاتىستى پىكىر ءبىلدىردى. باق مالىمەتىنشە، اقش تاراپىنىڭ مالىمدەمەسىندە:
"امەريكانى ەشكىم ەشقاشان پايدالانا المايدى" دەگەن ءسوز ايتىلعان.
بۇل وقيعا ۆاشينگتون مەن كيەۆ اراسىنداعى قارىم-قاتىناسقا قالاي اسەر ەتەتىنى بەلگىسىز. الداعى ۋاقىتتا ەكى ەل باسشىلارىنىڭ تاعى دا كەزدەسۋى مۇمكىن بە، جوق پا – ول جاعى ازىرگە بەلگىسىز.
