بۇرىن رەسەيدىڭ پروپاگانديستەرى عانا ايتاتىن سوزدەرىدى سوڭعى كۇندەرى ترامپتان باستاپ ءبىراز ادام ايتىپ كەتتى. وسى جەردە دە سونداي ماندەگى قازاقشا ماتىندەر كەزدەسە باستاعان سوڭ، ويىمدى جازىپ قويايىن دەدىم. كوپشىلىك سولاردىڭ جازعانىن وقي-وقي سەنىپ قالماسىن.
زەلەنسكي سوعىسقا كىنالى، ۋكراينا رەسەيمەن سوعىسام دەپ بەكەر قىرىلىپ قالدى، رەسەيدى ەشكىم جەڭە المايدى دەگەن سياقتى سوزدەردى ايتاتىن ادامعا مەنىڭ مىناداي سۇراقتارىم بار:
زەلەنسكي نە ىستەۋى كەرەك ەدى؟
ۋكراينا سوعىسپاعاندا نە ىستەۋى كەرەك ەدى؟
رەسەي ەندى يمپەريا رەتىندە قايتا كۇشەيەدى دەپ شىن سەنەسىزدەر مە؟
بۇنداي تاقىرىپتار قازىر قورقىنىشتى كورىنە باستاعانىن، بولاشاقتا ءتىپتى قاۋىپتى تاقىرىپ رەتىندە قابىلدانا باستايتىنىن بىلەمىن. بىراق باق پەن الەۋمەتتىك جەلىدەگى اڭگىمەلەردەن دە ماڭىزدى ءبىر نارسە بار، ول - ءبىزدىڭ سانامىز. ءبىزدىڭ ميىمىزداعى، قازىرگى كوۋچتاردىڭ تىلىمەن ايتقانداعى "ۋستانوۆكالار". جوعارىدا ايتىلعان نارسەلەرگە سەنىپ قالساق، بىتتىك دەي بەرىڭىزدەر.
زەلەنسكي ءبارىن دۇرىس ىستەدى. كونستيتۋتسياسىنا ساي مەملەكەتتىڭ تەرريتورياسىن قورعادى. ەندى نە ىستەۋى كەرەك ەدى، قاشىپ كەتۋى كەرەك پە ەدى؟
ول سىرتتان كىرگەن جاۋدان ەلىن قورعادى. تىلىندا جاتقان باتىس ەلدەرىن كوندىردى. بۇگىن ۋكراينا شابۋىل وتىندە تۇرسا، ەرتەڭ وزدەرىڭ سونداي جاعدايدا قالاسىڭدار، سوندىقتان بىزگە كومەكتەسىڭدەر دەدى. ارپالىستى. سونىڭ ناتيجەسىندە ءالى كۇنگە ەلى امان-ەسەن تۇر، الەمنىڭ ەكىنشى اسكەرى دەپ كەلگەن جاۋى قارعا ادىم جەرى مۇڭ بولىپ، جۇزدەگەن ادامىنىڭ جانىن قيىپ، العا جىلجي الماي، تيتىقتاپ تۇر. بۇل - نەگىزىندە ەرلىك.
ۋكراين حالقىنىكى دە دۇرىس. ءوز تاعدىرىمىزدى ءوزىمىز شەشەمىز دەدى، وعان دەيىن وزدەرىنە ۇنامايتىن شەشىم قابىلداعان باسشىلارىن توڭكەرىپ تە تاستادى. وزدەرى بىلەدى عوي؟ كىمنىڭ نە اقىسى بار؟ ولسەك تە، ورىسقا كونبەيمىز، كەشە عانا شىققان قورامىزعا قايتا كىرمەيمىز دەدى. مىنە، ءالى سول نيەتتەرىنەن قايتپاي سوعىسىپ جاتىر. وسىعان دەيىن ولگەن ادامدارىن الىپ قالۋ ءۇشىن، قيراعان قالالارىن ساقتاپ قالۋ ءۇشىن كونە بەرۋلەرىنە دە بولار ەدى. بىراق ولار ءۇشىن كوزگە كورىنبەيتىن دۇنيەلەر ماڭىزدىراق بولىپ تۇر عوي. ەرتە مە، كەش پە، بۇل سوعىس بىتەدى، ۋكراينا سول كەزدە مىقتى ەل بولادى، كورەسىزدەر. قازىر سوعىس كورگەن بالالار ەرتەڭ مىقتى-مىقتى تۇلعا بولادى. قازىرگى قىرىلىپ جاتقاندار سولار ءۇشىن ءولىپ جاتىر.
ۆيكتور شەندەروۆيچتىڭ ايتقانى بار. رەسەي يمپەرياسى 1917 جىلدان باستاپ ىدىراۋ ۇدەرىسىنەن ءوتىپ جاتىر دەيدى. ءبىر قيراۋى سول 1917 جىلى، ەكىنشى رەت قيراۋى 1991 جىلى بولدى دەيدى. ريم يمپەرياسىنىڭ ىدىراۋى 300 جىلعا ۇلاسقان، سول ارالىقتا كەلگەن ءاربىر يمپەراتور يمپەريانى ساقتاپ قالا الامىن دەپ ويلاعان دەيدى. مەن وسىعان سەنەمىن. رەسەي يمپەريالىق پيعىلىنان قايتىپ، ەسىگىن تارس جاۋىپ الىپ ءوزىن-ءوزى ەمدەۋگە كوشەتىن كۇن كەلەدى.
راس، دۇنيەنىڭ استان-كەستەنى شىعاتىن ءتۇرى بار. بىزدە دە كوپ وزگەرىس بولادى-اۋ. بىراق ءىشىمىزدى بەرمەۋىمىز كەرەك. بۇدان دا وتەمىز عوي.
مەنىڭ مەملەكەتتى باسقارىپ وتىرعان ادامدارعا ەشقانداي جاۋلىعىم جوق. اينالىپ كەلگەندە ولار ءۇشىن دە پايدالى اداممىن دەپ ەسەپتەيمىن ءوزىمدى. "بەتەگە كەتەر بەل قالار، بەكتەر كەتەر، ەل قالار". سىزدەر ءبىر كۇنى كەتەسىزدەر، بار كەزدەرىڭىزدە مەن سياقتى ادامدارمەن سىيلاسىپ قالىڭىزدار...
ارمان المەنبەت
