بەلگىلى سپورتشى ءاليا يۋسۋپوۆا كوركەم گيمناستيكادان قازاقستان ۇلتتىق قۇراماسىنىڭ باس باپكەرى قىزمەتىنەن كەتتى. بۇل تۋرالى ول Instagram الەۋمەتتىك جەلىسىندەگى پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
ءاليا يۋسۋپوۆا سپورتشىلاردى باستى دودالارعا دايىنداعانىنا قۋانىشتى ەكەنىن ايتتى.
«مەن ءوزىم دايىنداعان سپورتشىنى وليمپياداعا شىعارىپ، سول ويىندارعا باپكەر رەتىندە قاتىسۋدى ماقسات ەتتىم. 2012 جىلى ماعان وسىنداي مۇمكىندىك بەرىلىپ، قازاقستان قۇراماسىنىڭ باس باپكەرى قىزمەتىنە كىرىستىم. ءۇش وليمپيادادا ءبىز جاقسى ناتيجەلەر كورسەتە الدىق. ءۇش رەت گيمناستتاردى تورتجىلدىقتىڭ باستى دوداسىنا دايىنداعانىما وتە قۋانىشتىمىن»، - دەيدى ءا.يۋسۋپوۆا.
ول جاۋاپتى قىزمەتتە وزىنە سەنىم ارتقانى ءۇشىن قازاق ەلىنە، باسشىلىققا العىسىن ءبىلدىردى.
«2025 جىلدىڭ قاڭتارىنان باستاپ باس باپكەر قىزمەتىنەن كەتەمىن. ويتكەنى فەدەراتسياداعى جۇمىسقا تولىقتاي كوڭىل بولگىم كەلەدى. وسىلايشا، باسقا باپكەرلەرگە وزدەرىن كورسەتۋگە مۇمكىندىك بەرۋدى ءجون كوردىم. بارشاڭىزعا ساتتىلىك تىلەيمىن»، - دەدى ءاليا يۋسۋپوۆا.
قازاقستان گيمناستيكا فەدەراتسياسىنان تۇسكەن مالىمەتكە قاراعاندا، يۋسۋپوۆانىڭ جەتەكشىلىگىمەن قازاقستاندىق گيمناستتار حالىقارالىق ارەنالاردا تابىسقا جەتىپ، قۇرلىقتىق چەمپيوناتتاردا، ازيا ويىندارىندا جانە الەمدىك تۋرنيرلەردە بىرنەشە مەدال جەڭىپ الدى.
ەسكە سالا كەتەيىك، ءاليا يۋسۋپوۆا 2024 جىلى 20 جەلتوقساندا مەملەكەت باسشىسى قاسىم-جومارت توقاەۆتىڭ قابىلداۋىندا بولعان ەدى.
سول كەزدە پرەزيدەنت ءاليا يۋسۋپوۆانى قازاقستان گيمناستيكا فەدەراتسياسىنىڭ پرەزيدەنتى بولىپ قايتا سايلانۋىمەن قۇتتىقتاعان ەدى.
ءاليا يۋسۋپوۆا سپورت سالاسىنداعى كەيبىر وزەكتى پروبلەمالارعا قاتىستى بىرقاتار ۇسىنىسىن جەتكىزگەن. فەدەراتسيا باسشىسىنىڭ ايتۋىنشا، بالالاردى گيمناستيكاعا ەرتە جاستان باۋلۋ ءۇشىن كەشەندى جۇمىس اتقارىلۋى كەرەك.
قاسىم-جومارت توقاەۆ سالا ينفراقۇرىلىمىن دامىتۋ جانە جاتتىقتىرۋشىلاردى دايارلاۋ ىسىندە تۋريزم جانە سپورت مينيسترلىگىمەن تىعىز قارىم-قاتىناس ورناتۋ قاجەت ەكەنىن ايتقان بولاتىن.
