"اتىراۋ" فۋتبول كلۋبىنىڭ باس باپكەرى بولىپ سامات سماقوۆ تاعايىندالدى. بۇل تۋرالى كلۋبتىڭ ءباسپاسوز قىزمەتى مالىمدەدى، دەپ حابارلايدى "ادىرنا".
سامات سماقوۆ ويىنشى رەتىندە دە قازاقستان فۋتبولىندا وزىندىك ءىز قالدىرعان:
- قازاقستان ۇلتتىق قۇراماسى ساپىندا 76 ماتچ وتكىزدى;
- ەل چەمپيونى اتاندى;
- ءتورت رەت قازاقستاننىڭ ۇزدىك فۋتبولشىسى دەپ تانىلدى.
ونىڭ باپكەرلىك مانسابى دا قارقىندى دامىدى. سماقوۆ "ورداباسى" كلۋبىنىڭ جاتتىقتىرۋشىلار شتابىندا جۇمىس ىستەپ، كەيىن "ەلىماي" كومانداسىن باسقاردى. ونىڭ جەتەكشىلىگىمەن سەمەيلىك كلۋب پرەمەر-ليگاعا جولداما الدى.
كەيىن سامات سماقوۆ "استانا" كلۋبىندا تەحنيكالىق ديرەكتور قىزمەتىن اتقارىپ، ودان سوڭ "جەتىسۋ" كومانداسىنىڭ باس باپكەرى بولدى.
"جاڭا باس باپكەرىمىزگە ساتتىلىك، مول تابىس جانە "اتىراۋمەن" بىرگە جارقىن جەڭىستەر تىلەيمىز!" – دەلىنگەن كلۋب حابارلاماسىندا.
پرەمەر-ليگانىڭ 10-تۋرىندا "اتىراۋ" 9 تامىزدا "اقتوبە" كومانداسىن "تۇركىستان ارەنا" ستاديونىندا قابىلدايدى.
"اتىراۋ كومانداسى نەگىزگى ستاديونى دايىن بولماعاندىقتان، ۇيدەگى ماتچتارىن باسقا ارەنادا وتكىزىپ ءجۇر", – دەپ ءتۇسىندىردى قپل ءباسپاسوز قىزمەتى.
