فۋتبولدان قازاقستان ۇلتتىق قۇراماسىن ءالي اليەۆ جاتتىقتىرۋى مۇمكىن، دەپ حابارلايدى “ادىرنا” ۇلتتىق پورتالى.
44 جاستاعى مامان جاقىندا عانا پەتروپاۆلدىڭ "قىزىلجار" كومانداسىنان كەتكەن بولاتىن. بۇعان دەيىن ول "جەڭىس", "شاحتەر" جانە "استانا" جاستار كومانداسىن جاتتىقتىردى.
اليەۆتىڭ دايىنداۋىمەن 2023 جىلى "قىزىلجار" پرەمەر-ليگادا بەسىنشى ورىنعا يە بولىپ، كونفەرەنتسيا ليگاسىنىڭ ىرىكتەۋ كەزەڭىندە وينادى. كوماندا العاشقى ىرىكتەۋ كەزەڭىندە حورۆاتيانىڭ "وسيەك" كومانداسىن جارىس جولىنان شىعارعان ەدى.
ايتا كەتەيىك، 27-ءشى قاڭتار كۇنى ەلىمىزدىڭ فۋتبول فەدەراتسياسى باس باپكەر ستانيسلاۆ چەرچەسوۆتىڭ جۇمىستان كەتكەنى تۋرالى مالىمدەدى. ونىمەن بىرگە ۇلتتىق فۋتبول قۇراماسىنىڭ جاتتىقتىرۋشىلار شتابى دا جۇمىسىن توقتاتقان ەدى.
«ەڭبەك شارتى ەكى جاقتىڭ ءوزارا كەلىسىمى بويىنشا توقتاتىلدى. ستانيسلاۆ چەرچەسوۆ قازاقستان قۇراماسىنىڭ تىزگىنىن 2024 جىلعى ماۋسىمدا ۇستادى. ونىڭ جەتەكشىلىگىمەن ۇلتتىق قۇراما ۋەفا ۇلتتار ليگاسىندا 6 ماتچ وتكىزىپ، نورۆەگيا قۇراماسىمەن تەڭ ويناپ، 1 ۇپاي جينادى. سونداي-اق قازاقستان قۇراماسىنان جاتتىقتىرۋشىلار شتابى تولىق قۇراممەن كەتتى. قازاقستان فۋتبول فەدەراتسياسى ستانيسلاۆ چەرچەسوۆ پەن ونىڭ شتابىنا اتقارعان جۇمىسى ءۇشىن العىس ايتىپ، مانسابىنا تابىس تىلەيدى!»، — دەلىنگەن حابارلامادا.
العاشىندا فۋتبولدان ۇلتتىق قۇرامانىڭ باس باپكەرى قىزمەتىنە ۇمىتكەرلەر ءتىزىمى قاراستىرىلىپ جاتقانى ايتىلعان بولاتىن.
