وسى ءبىر قاسىرەتكە تولى مۇڭدى ءاندى ەستىگەن سايىن كوڭىلىم بۇزىلادى.... العاشقى ەستىگەنىم ەسىمە تۇسەدى.
ۇمىتپاسام، 1988-جىل، مونعوليا، ۋلانباتىر قالاسىنداعى تەحنيكالىق ۋنيۆەرسيتەتتە ستۋدەنتپىن.
قىسقى دەمالىستا اۋىلعا كەلدىم، ول كەزدە بايان-ولگيلىك قازاقتار ازاتتىق راديوسىن تىڭدايدى.
ازاتتىق راديوسىنان جەلتوقسان تۋرالى تۇراقتى حابار بەرىپ تۇرادى، وسى ءاندى جۇرت راديودان ەستىگەن ەكەن.
اۋىلعا كەلگەندەگى ءبىرىنشى ەستىگەن جاڭالىعىم وسى بولدى "جەلتوقسان تۋرالى وتە كۇشتى ءان شىعىپتى، ازاتتىق راديوسىنان كۇندە بەرەدى" - دەگەن..
ازاتتىقتىڭ حابار تاراتاتىن ۋاقىتى تاڭعى ساعات التى، جەتى شاماسىندا بولاتىن..
تاڭەرتەڭ ەرتە ويانىپ، راديونى قوسىپ تىڭداۋعا كىرىستىم، ايتقانداي جەلتوقسان كوتەرىلىسى تۋرالى حاباردىڭ كەزەكتى ءبولىمىن جالعاستىردى... حابار سوڭىندا سۇڭقىلداتىپ "جەلتوقسان بىردە، ەل توسقان تۇردە، كەلەتىن مۇلدە جايدارلى..."- دەپ باستاپ جىبەردى...
جان - دۇنيەم استاڭ - كەستەڭ بولدى... جۇرەگىم قان جىلادى،ەكى كوزىمدى جاس جاۋدى...
تۇڭعىش رەت وكىندىم... شەتتە تۋعانىما، الماتىدا وقىماعانىما.... الاڭعا شىققان قازاقتىڭ ۇل - قىزدارىمەن بىرگە تاياق جەمەگەنىمە وكىندىم.
1986-جىلى جەلتوقساندا الاڭعا اتويلاپ شىققان، كەۋدەسىن ىزا مەن كەك بۋعان، نامىس مەن ەرلىكتىڭ يەسى - قازاقتىڭ ۇلى مەن قىزى... مەنىڭ تۋىسىم ەدى، مەنىڭ قانىم ەدى، كوبىسى مەنىڭ قۇرداستارىم ەدى..
مەن ءوزىمدى وسى ەرجۇرەك باتىرلاردىڭ الدىندا ماڭگىلىك قارىزدار سانايمىن...
ءومىرتاي لاحان
