قازاقستاننىڭ بەلگىلى ءپۋبليتسيستى، جازۋشى، قوعام قايراتكەرى قايىم-مۇنار تابەەۆ دۇنيەدەن ءوتتى، دەپ حابارلايدى "ادىرنا" ۇلتتىق پورتالى.
قارالى حاباردى جازۋشى ءارى جۋرناليست تالعات ايتباي الەۋمەتتىك جەلىدە راستادى.
"وسىدان ءبىر ساعات بۇرىن روزا سەيىلحانقىزى تەلەفون شالدى.
“جەدەلحان زۆوندادى. جىلاپ تۇر. التىنىمنان ايىرىلىپ قالدىم دەيدى. ول كىم دەۋگە دە كەلتىرمەدى. ەركىندى سۇرادى” دەيدى.
توبەمنەن جاي تۇسكەندەي بولىپ ەركىنگە حابارلاستىم. اۋەلى وداققا حابار كەلەر ەدى عوي،- دەيدى ول.
قاينار دا ءابىرجىدى. ول دا ەستىمەگەن...
نە بولسا دا. ءوزىنىڭ تەلەفونىنا سوعىپ كورەيىن، بالكىم بىرەۋى كوتەرىپ قالار دەگەن ويىمنان دا ەشتەڭە شىقپادى.
مىنە، ۇلبوسىن ايتولەن راستادى. جىلاپ تۇر. جەدەلحان ەركىننىڭ تەلەفونىن سۇراپ جاتىر دەيدى.
نە كەرەك، جامان حابار راستالدى.
قازاق ادەبيەتى ءبىر ساربازىنان ايىرىلدى…
قايىممۇنار تابەي باقيلىق جولىنا ءتۇسىپتى.
وتكەن جىلى انا جاققا بارماسا دا، بارعانداي بولىپ كەلىپ ءپدى. قايران ارىپتەس، كۋرستاس دوس، الدىڭدا باس يەمىز. سەن ەلگە كەرەك، ءالى دە جۇمباعى كوپ جەلتوقسان جونىندە جازارىڭ قيساپسىز قالامگەر ەدىڭ…
وتباسى، اعايىندارىنا كوڭىل ايتۋ ءسوزى بولسىن، باسقا جۇرت ءبىلسىن دەپ جازىپ وتىرمىن", - دەپ جازبا جاريالادى تالعات ايتباي.
قايىم-مۇنار تابەي 1956 جىلى 5 مامىردا اياگوز اۋدانىنداعى دۇنيەگە كەلگەن. 1981 جىلى ءال-فارابي اتىنداعى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن تامامداعان. كەيىن قازاق مەملەكەتتىك زاڭ ۋنيۆەرسيتەتىندە، الماتى مەملەكەتتىك باسقارۋ ينستيتۋتىندا جانە قر پرەزيدەنتى جانىنداعى مەملەكەتتىك قىزمەت اكادەمياسىندا ءبىلىمىن جالعاستىرعان.
ول جۋرناليستيكا سالاسىندا «قازاقستان پيونەرى» («ۇلان»), «لەنينشىل جاس» («جاس الاش»), «قازاق ادەبيەتى»، «ەگەمەن قازاقستان» گازەتتەرىندە ەڭبەك ەتتى. ءار جىلدارى قازاقستان پرەزيدەنتى ءباسپاسوز قىزمەتىندە، قر ءباسپاسوز جانە بۇقارالىق اقپارات مينيسترلىگىندە، الماتى قالاسى اكىمدىگىنىڭ ىشكى ساياسات جانە ءتىل باسقارماسىندا، سونداي-اق قازاقستان حالقى اسسامبلەياسىنىڭ حاتشىلىعىندا جاۋاپتى قىزمەتتەر اتقاردى.
قايىم-مۇنار تابەەۆ جەلتوقسان وقيعاسى تۋرالى العاشقىلاردىڭ ءبىرى بولىپ باسپاسوزدە ماقالا جاريالاعان قالامگەر رەتىندە بەلگىلى. ول 1986 جىلعى جەلتوقساندى وقيعا ەمەس، «كوتەرىلىس» دەپ باعالاپ، جاستاردىڭ "باستى تالابى" ەلدە انا تىلىندە سويلەۋ جانە ءبىلىم الۋ قۇقىعى ەكەنىن اشىق ايتقان.
